എഐ 'ചാറ്റ്ബോട്ട് സൈക്കോസിസ്': ജാഗ്രതാ നിർദ്ദേശവുമായി കാനഡയിലെ മനഃശാസ്ത്രജ്ഞർ

AI ചാറ്റ്ബോട്ടുകളുമായുള്ള അമിതവും അപകടകരവുമായ സമ്പർക്കം മൂലം ഉപഭോക്താക്കളിൽ 'ചാറ്റ്ബോട്ട് സൈക്കോസിസ്'  എന്ന മാനസികാവസ്ഥ ഉണ്ടായേക്കാമെന്ന് കാനഡയിലെ മനഃശാസ്ത്രജ്ഞർ മുന്നറിയിപ്പ് നൽകുന്നു. ഒറ്റപ്പെടൽ അനുഭവിക്കുന്നവരിലും മാനസിക പ്രയാസങ്ങൾ നേരിടുന്നവരിലും ഇത്തരം ചാറ്റ്ബോട്ടുകൾ മിഥ്യാധാരണകൾ വർദ്ധിപ്പിക്കാൻ കാരണമാകുന്നുണ്ട്. ഇതിൻ്റെ ഭാഗമായി, പ്രത്യേകിച്ച് കൗമാരക്കാരിലും യുവാക്കളിലും, ഇത്തരം ബോട്ടുകളുമായുള്ള ബന്ധം പരിശോധിക്കാൻ ഡോക്ടർമാർക്ക് പുതിയ മാർഗ്ഗനിർദ്ദേശങ്ങൾ നൽകിയിട്ടുണ്ട്. കഴിഞ്ഞ ഫെബ്രുവരിയിൽ ടംബ്ലർ റിഡ്ജിൽ നടന്ന വെടിവെപ്പിന് പിന്നിൽ പ്രതിക്ക് ഇത്തരം എഐ ചാറ്റ്ബോട്ടുകളുമായുള്ള ബന്ധമുണ്ടെന്ന ആരോപണം ഉയർന്ന പശ്ചാത്തലത്തിലാണ് ഈ നീക്കം.

ചാറ്റ്ബോട്ടുകളെ  വിശ്വസ്തരായി കാണുന്നതും അവ മനുഷ്യബന്ധങ്ങൾക്ക് പകരമാകുന്നതും ഗുരുതരമായ പ്രത്യാഘാതങ്ങൾ ഉണ്ടാക്കുമെന്ന് കനേഡിയൻ ജേണൽ ഓഫ് സൈക്യാട്രിയിൽ പ്രസിദ്ധീകരിച്ച ലേഖനം വ്യക്തമാക്കുന്നു. ഉപഭോക്താക്കളുടെ അപകടകരമായ ചിന്തകളെ ശരിവെക്കുന്ന തരത്തിൽ ബോട്ടുകൾ പ്രതികരിക്കുന്നത് സ്വയം ഉപദ്രവിക്കാനോ മറ്റുള്ളവർക്ക് ദോഷം ചെയ്യാനോ ഉള്ള പ്രവണത വർദ്ധിപ്പിക്കുന്നു. അതിനാൽ, രോഗികളോട് അവരുടെ എഐ ഉപയോഗത്തെക്കുറിച്ച് തുറന്നു ചോദിക്കാനും അവർ ഇത്തരം ഡിജിറ്റൽ ബന്ധങ്ങളിൽ എത്രത്തോളം ആഴത്തിൽ ഉൾപ്പെട്ടിട്ടുണ്ടെന്ന് വിലയിരുത്താനും ഡോക്ടർമാരോട് നിർദ്ദേശിച്ചിട്ടുണ്ട്. എഐ കമ്പനികൾ ഉപഭോക്താക്കളുടെ സുരക്ഷയിൽ പുലർത്തേണ്ട ജാഗ്രതയെക്കുറിച്ചും വലിയ ചർച്ചകൾക്കാണ് ഈ റിപ്പോർട്ട് വഴിതുറന്നിരിക്കുന്നത്.