കാനഡയിൽ റോജേഴ്സ് ഉപഭോക്താക്കളെ കബളിപ്പിച്ച് ഐപാഡുകൾ തട്ടിയെടുക്കുന്ന സംഘം സജീവം

സൗജന്യ ഐപാഡുകളും ആകർഷകമായ ഫോൺ പ്ലാനുകളും വാഗ്ദാനം ചെയ്ത് കാനഡയിലെ റോജേഴ്സ്  ഉപഭോക്താക്കളെ കബളിപ്പിക്കുന്ന പുതിയ രീതിയിലുള്ള തട്ടിപ്പ് വർദ്ധിച്ചുവരുന്നു. റോജേഴ്സ് ജീവനക്കാരെന്ന വ്യാജേന വിളിക്കുന്ന തട്ടിപ്പുകാർ, ഉപഭോക്താക്കളെക്കൊണ്ട് കമ്പനിയുടെ ആപ്പ് വഴി ഐപാഡ് ഫിനാൻസിംഗ് കരാറുകളിൽ ഒപ്പു വയ്പ്പിക്കുന്നു. ഉപകരണം വീട്ടിലെത്തിക്കഴിഞ്ഞാൽ, പ്ലാനിൽ തെറ്റ് സംഭവിച്ചുവെന്നും അത് പരിഹരിക്കാൻ ഐപാഡ് തിരികെ അയക്കണമെന്നും പറഞ്ഞ് ഇവർ ഉപഭോക്താക്കളെ വീണ്ടും സമീപിക്കും. തുടർന്ന് തട്ടിപ്പുകാർ നൽകുന്ന വിലാസത്തിലേക്ക് അയക്കുന്ന ഐപാഡുകൾ അവരുടെ കൈകളിലെത്തുകയും, ഉപഭോക്താക്കൾ തങ്ങളുടെ കൈവശമില്ലാത്ത ഉപകരണത്തിന് വലിയ തുക മാസഗഡുക്കളായി അടയ്ക്കേണ്ടി വരികയും ചെയ്യുന്നു.

ഈ തട്ടിപ്പിന് ഇരയായവർക്ക് ആയിരക്കണക്കിന് ഡോളറിൻ്റെ ബാധ്യതയാണ് ഉണ്ടായിരിക്കുന്നത്. റോജേഴ്സ് പോലുള്ള കമ്പനികൾ ഉപഭോക്താക്കൾക്ക് ലളിതമായ സഹായങ്ങൾ വാഗ്ദാനം ചെയ്യുന്നുണ്ടെങ്കിലും, തട്ടിപ്പിന് ഇരയായവർക്ക് മുഴുവൻ തുകയും ഒഴിവാക്കി നൽകാൻ തയ്യാറായിട്ടില്ല. ഈ വർഷം മാത്രം സേവനവുമായി ബന്ധപ്പെട്ട ഇത്തരം തട്ടിപ്പുകളിലൂടെ ദശലക്ഷക്കണക്കിന് ഡോളർ ആളുകൾക്ക് നഷ്ടപ്പെട്ടതായി കനേഡിയൻ ആൻ്റി ഫ്രോഡ് സെൻ്റർ (CAFC) മുന്നറിയിപ്പ് നൽകുന്നു. അപരിചിതമായ വിലാസങ്ങളിലേക്ക് ഉപകരണങ്ങൾ അയക്കരുതെന്നും, കമ്പനികൾ ഒരിക്കലും ഫോണിലൂടെ ഉപകരണങ്ങൾ തിരികെ ആവശ്യപ്പെടില്ലെന്നും അധികൃതർ ജനങ്ങളെ ഓർമ്മിപ്പിക്കുന്നു.