ലൂയിസ് ആർബർ കാനഡയുടെ പുതിയ ഗവർണർ ജനറലാകും, ജൂലൈയിൽ ചുമതലയേല്ക്കും

 

കാനഡയുടെ പുതിയ ഗവർണർ ജനറലായി ലൂയിസ് ആർബർ നിയമിതയായി. നിലവിലെ ഗവർണർ ജനറൽ മേരി സൈമണിൻ്റെ കാലാവധി അവസാനിക്കുന്ന മുറയ്ക്ക് 2026 ജൂലൈയിൽ ഇവർ ചുമതലയേൽക്കും. ചൊവ്വാഴ്ച പ്രധാനമന്ത്രി മാർക്ക് കാർണിയാണ് ഓട്ടവയിൽ വച്ച് ഈ പ്രഖ്യാപനം നടത്തിയത്. കാനഡയുടെ മുപ്പത്തിയൊന്നാമത്തെ ഗവർണർ ജനറലായാണ് 79-കാരിയായ ആർബർ നിയമിതയാകുന്നത്. നീതിക്കും സുതാര്യതയ്ക്കും വേണ്ടി നിലകൊള്ളുന്ന ലൂയിസ് ആർബറുടെ നിയമനം കാനഡയുടെ ജനാധിപത്യ സംവിധാനത്തെ ശക്തിപ്പെടുത്തുമെന്ന് പ്രധാനമന്ത്രി മാർക്ക് കാർണി പ്രത്യാശ പ്രകടിപ്പിച്ചു.

മോൺട്രിയലിൽ ജനിച്ച ഇവർ കാനഡയിലെ സുപ്രീം കോടതി ജഡ്ജിയായും ഐക്യരാഷ്ട്രസഭയുടെ മനുഷ്യാവകാശ ഹൈക്കമ്മീഷണറായും സേവനമനുഷ്ഠിച്ചിട്ടുണ്ട്. അന്താരാഷ്ട്ര ക്രിമിനൽ ട്രൈബ്യൂണലുകളുടെ ചീഫ് പ്രോസിക്യൂട്ടറായും കനേഡിയൻ സൈന്യത്തിലെ ലൈംഗികാതിക്രമങ്ങളെക്കുറിച്ചുള്ള അന്വേഷണത്തിനും ഇവർ നേതൃത്വം നൽകിയിട്ടുണ്ട്. ഇംഗ്ലീഷ്, ഫ്രഞ്ച് ഭാഷകൾ കൈകാര്യം ചെയ്യുന്ന ഒരു വ്യക്തി വീണ്ടും ഈ പദവിയിലേക്ക് തിരിച്ചെത്തുന്നു എന്നതാണ് ആർബറുടെ നിയമനത്തിൻ്റെ മറ്റൊരു പ്രത്യേകത. മുൻ ഗവർണർ ജനറൽ മേരി സൈമൺ ഇംഗ്ലീഷ്, ഇനക്റ്റിറ്റട്ട്  ഭാഷകളാണ് സംസാരിച്ചിരുന്നത്.

2021-ൽ ചുമതലയേറ്റ മേരി സൈമൺ, ഈ പദവിയിലെത്തിയ ആദ്യത്തെ തദ്ദേശീയ വ്യക്തിയാണ്. തദ്ദേശീയരുടെ അവകാശങ്ങൾക്കും ഭാഷാ സംരക്ഷണത്തിനുമായി അവർ പ്രവർത്തിച്ചു. ബ്രിട്ടനിലെ ചാൾസ് മൂന്നാമൻ രാജാവിനെയാണ് കാനഡയിൽ ഗവർണർ ജനറൽ പ്രതിനിധീകരിക്കുന്നത്. പ്രധാനമന്ത്രിയെ സത്യപ്രതിജ്ഞ ചെയ്യിക്കുക, പാർലമെൻ്റ് പിരിച്ചുവിടുക, നിയമങ്ങൾക്ക് അംഗീകാരം നൽകുക, സായുധ സേനയുടെ കമാൻഡർ-ഇൻ-ചീഫ് ആയി പ്രവർത്തിക്കുക എന്നിവയാണ് പ്രധാന ചുമതലകൾ.