അറ്റ്‌ലാൻ്റിക് സമുദ്രത്തിലെ ക്രൂയിസ് കപ്പലിൽ ഹൻ്റാ വൈറസ് ബാധ: മൂന്ന് മരണം

 

അറ്റ്‌ലാൻ്റിക് സമുദ്രത്തിലൂടെ സഞ്ചരിച്ചിരുന്ന എംവി ഹോണ്ടിയസ് (MV Hondius) എന്ന ക്രൂയിസ് കപ്പലിൽ പടർന്നുപിടിച്ച ഹൻ്റാവൈറസ് ബാധയെത്തുടർന്ന് മൂന്ന് യാത്രക്കാർ മരണപ്പെട്ടു. അർജൻ്റീനയിൽ നിന്ന് കേപ് വെർഡെയിലേക്ക് യാത്ര ചെയ്യുകയായിരുന്ന കപ്പലിലെ യാത്രക്കാരാണ് മരിച്ചത്. മരിച്ചവരിൽ നെതർലൻഡ്‌സ് സ്വദേശികളായ ദമ്പതികളും ഒരു ജർമ്മൻ പൗരനും ഉൾപ്പെടുന്നു. നിലവിൽ മറ്റ് മൂന്ന് പേർ കൂടി രോഗലക്ഷണങ്ങളോടെ തീവ്രപരിചരണ വിഭാഗത്തിൽ ചികിത്സയിലാണ്.

രോഗബാധയെത്തുടർന്ന് ദക്ഷിണാഫ്രിക്കയിലെ ജോഹന്നാസ്ബർഗിലും സെൻ്റ് ഹെലീനയിലുമായിട്ടാണ് രോഗികളെ പ്രവേശിപ്പിച്ചത്. ക്രൂയിസ് കപ്പലിൽ നിലവിൽ 149 യാത്രക്കാരുണ്ടെന്നും ഇതിൽ നാല് പേർ കനേഡിയൻ പൗരന്മാരാണെന്നും കപ്പൽ അധികൃതർ അറിയിച്ചു. എലികൾ ഉൾപ്പെടെയുള്ള മറ്റ്  ജീവികളിലൂടെയുമാണ് പ്രധാനമായും ഹൻ്റാവൈറസ് പകരുന്നത്. രോഗബാധിതരായ ജീവികളുടെ മൂത്രം, ഉമിനീർ, വിസർജ്യം എന്നിവയുമായുള്ള സമ്പർക്കത്തിലൂടെയോ ഇവ വായുവിൽ കലരുന്നത് ശ്വസിക്കുന്നതിലൂടെയോ മനുഷ്യരിലേക്ക് വൈറസ് എത്തുന്നു.

കപ്പലിലെ രണ്ട് ജീവനക്കാർക്ക് ശ്വാസകോശ സംബന്ധമായ ഗുരുതര പ്രശ്നങ്ങൾ റിപ്പോർട്ട് ചെയ്തിട്ടുണ്ട്. ലോകാരോഗ്യ സംഘടനയുടെ (WHO) നേതൃത്വത്തിൽ വിവിധ രാജ്യങ്ങളിലെ ആരോഗ്യ വകുപ്പുകൾ ചേർന്ന് സ്ഥിതിഗതികൾ നിരീക്ഷിച്ചു വരികയാണ്. നിലവിൽ കപ്പലിൽ ഐസൊലേഷൻ ഉൾപ്പെടെയുള്ള കർശന മുൻകരുതൽ നടപടികൾ സ്വീകരിച്ചിട്ടുണ്ടെന്നും വൈറസിൻ്റെ വകഭേദം തിരിച്ചറിയാനുള്ള ശാസ്ത്രീയ പരിശോധനകൾ നടന്നു വരികയാണെന്നും അധികൃതർ വ്യക്തമാക്കി.