വിദേശ ഡോക്ടര്മാര്ക്കുള്ള വിസ വിലക്ക് ട്രംപ് ഭരണകൂടം നീക്കി
By: 600002 On: May 5, 2026, 11:18 AM
പി പി ചെറിയാന്
വാഷിംഗ്ടണ് ഡി.സി: വിദേശ രാജ്യങ്ങളില് നിന്നുള്ള ഡോക്ടര്മാര്ക്ക് ഏര്പ്പെടുത്തിയിരുന്ന കര്ശനമായ വിസ നിയന്ത്രണങ്ങളില് ഇളവ് വരുത്തി ട്രംപ് ഭരണകൂടം. മാസങ്ങള് നീണ്ട അനിശ്ചിതത്വത്തിനൊടുവില്, വിദേശ ഡോക്ടര്മാരുടെ വിസ നടപടികള് പുനരാരംഭിക്കാന് ആഭ്യന്തര സുരക്ഷാ വകുപ്പ് (DHS) അനുമതി നല്കി.
39 രാജ്യങ്ങളില് നിന്നുള്ളവര്ക്ക് ഏര്പ്പെടുത്തിയിരുന്ന വിസ നിയന്ത്രണങ്ങളില് നിന്നാണ് ഡോക്ടര്മാരെ ഒഴിവാക്കിയത്.
2026 ജനുവരി 1 മുതല് പ്രാബല്യത്തില് വന്ന യാത്രാ വിലക്കിനെത്തുടര്ന്ന് വിസ പുതുക്കലുകളും ഗ്രീന് കാര്ഡ് അപേക്ഷകളും തടസ്സപ്പെട്ടിരുന്നു.
അമേരിക്കയിലെ ആരോഗ്യ മേഖലയിലെ പ്രതിസന്ധി കണക്കിലെടുത്താണ് ഈ പിന്മാറ്റം. യുഎസിലെ ഡോക്ടര്മാരില് കാല്ഭാഗവും വിദേശത്ത് പരിശീലനം നേടിയവരാണ്.
വിദേശ ഡോക്ടര്മാരില് 64 ശതമാനവും സേവനമനുഷ്ഠിക്കുന്നത് ഗ്രാമീണ മേഖലകളിലും ഡോക്ടര്മാരുടെ കുറവുള്ള പ്രദേശങ്ങളിലുമാണ്. നിയന്ത്രണം തുടരുന്നത് ആരോഗ്യരംഗത്തെ തകര്ക്കുമെന്ന് മെഡിക്കല് സംഘടനകള് മുന്നറിയിപ്പ് നല്കിയിരുന്നു.
ഈ പുതിയ ഉത്തരവോടെ വിദേശ ഡോക്ടര്മാര്ക്ക് അമേരിക്കന് ആശുപത്രികളില് ജോലി ചെയ്യുന്നതിനായുള്ള വിസകള് തടസ്സമില്ലാതെ ലഭിക്കും.