മെട്രോ വാൻകൂവർ ഭവന വിപണിയിൽ മാന്ദ്യം: ഉപഭോക്താക്കളെ ആകർഷിക്കാൻ 'ട്രൈ ബിഫോർ യു ബൈ' പദ്ധതിയുമായി ഡെവലപ്പർമാർ

മെട്രോ വാൻകൂവറിൽ വീടുകളുടെ ശരാശരി വിൽപന വിലയിൽ ഇടിവുണ്ടായിട്ടും പുതിയ വീടുകൾ വാങ്ങാൻ ഉപഭോക്താക്കൾ വിമുഖത കാട്ടുന്നതായി റിപ്പോർട്ട്. നിലവിൽ വിപണിയിൽ ധാരാളം വീടുകൾ ലഭ്യമാണെങ്കിലും വില ഇനിയും കുറയുമെന്ന പ്രതീക്ഷയിലാണ് പലരും തീരുമാനങ്ങൾ വൈകിപ്പിക്കുന്നത്. ഈ സാഹചര്യം മറികടക്കാൻ വാൻകൂവറിലെ ഡെവലപ്പർമാർ നൂതനമായ മാർഗ്ഗങ്ങൾ ആവിഷ്കരിക്കുകയാണ്. ഇതിൻ്റെ ഭാഗമായി വാൻകൂവർ കൊമേഴ്‌സ്യൽ ഡ്രൈവിലെ ഒരു പുതിയ കെട്ടിട സമുച്ചയത്തിൽ 'ട്രൈ ബിഫോർ യു ബൈ' എന്ന ആകർഷകമായ പദ്ധതി വെസ്‌ഗ്രൂപ്പ് പ്രോപ്പർട്ടീസ് അവതരിപ്പിച്ചു.

ഒരു പുതിയ കാർ വാങ്ങുന്നതിന് മുൻപ് ടെസ്റ്റ് ഡ്രൈവ് ചെയ്യുന്നത് പോലെ, വീട് വാങ്ങാൻ താല്പര്യമുള്ളവർക്ക് വാരാന്ത്യത്തിൽ അവിടെ താമസിച്ച് സൗകര്യങ്ങൾ അനുഭവിച്ചറിയാൻ ഈ പദ്ധതി അവസരമൊരുക്കുന്നു. ഹോം ലോൺ പ്രീ-അപ്രൂവൽ ലഭിച്ച ഉപഭോക്താക്കൾക്ക് ഈ സൗകര്യം പ്രയോജനപ്പെടുത്താം. പ്രദേശത്തെ കടകളിലും റെസ്റ്റോറൻ്റുകളിലും ഉപയോഗിക്കാവുന്ന ഗിഫ്റ്റ് കാർഡുകൾ ഉൾപ്പെടെയുള്ള ആനുകൂല്യങ്ങളും ഇതിൻ്റെ ഭാഗമായി നൽകുന്നുണ്ട്. വാൻകൂവർ വിപണിയിൽ ഏകദേശം ഏഴായിരത്തോളം വീടുകൾ വിൽപനയാകാതെ കിടക്കുന്ന സാഹചര്യത്തിലാണ് ഇത്തരം ക്രിയേറ്റീവ് ഇൻസെൻ്റീവുകളിലൂടെ ഉപഭോക്താക്കളെ ആകർഷിക്കാൻ നിർമ്മാതാക്കൾ ശ്രമിക്കുന്നത്.