തൊഴിൽ നൈപുണ്യ സർട്ടിഫിക്കറ്റ് നേടുന്ന കനേഡിയൻ പൗരന്മാർക്ക് 5,000 ഡോളർ ബോണസ്

കാനഡയിൽ ഡിമാൻഡുള്ള തൊഴിലുകളിൽ വൈദഗ്ധ്യം നേടുന്നവർക്കായി ഫെഡറൽ സർക്കാർ പുതിയ സാമ്പത്തിക ആനുകൂല്യങ്ങൾ പ്രഖ്യാപിച്ചു. 2026-ലെ സ്പ്രിംഗ് എകണോമിക് റിപ്പോർട്ട് അവതരിപ്പിച്ചുകൊണ്ട് ധനകാര്യ മന്ത്രി ഫ്രാൻസ്വാ-ഫിലിപ്പ് ഷാംപെയ്ൻ ആണ് ഈ പ്രഖ്യാപനം നടത്തിയത്. 'റെഡ് സീൽ' (Red Seal) സർട്ടിഫിക്കേഷൻ വിജയകരമായി പൂർത്തിയാക്കുന്ന ഉദ്യോഗാർത്ഥികൾക്ക് ഒറ്റത്തവണ ബോണസായി 5,000 ഡോളർ ലഭിക്കും. ഭവന നിർമ്മാണം, അടിസ്ഥാന സൗകര്യ വികസനം, പ്രതിരോധം തുടങ്ങിയ മേഖലകളിൽ വർദ്ധിച്ചുവരുന്ന തൊഴിലാളി ക്ഷാമം പരിഹരിക്കാനായി അടുത്ത അഞ്ച് വർഷത്തിനുള്ളിൽ പരിശീലനത്തിനും നിയമനത്തിനുമായി 6 ബില്യൺ ഡോളർ നിക്ഷേപിക്കാനാണ് സർക്കാർ ലക്ഷ്യമിടുന്നത്.

ഈ പദ്ധതിയനുസരിച്ച്, നിർബന്ധിത ഇൻ-ക്ലാസ് സാങ്കേതിക പരിശീലനത്തിൽ പങ്കെടുക്കുന്ന കാലയളവിൽ അപ്രൻ്റിസുകൾക്ക് ആഴ്ചയിൽ 400 ഡോളർ വീതം (ആകെ 16,000 ഡോളർ വരെ) സാമ്പത്തിക സഹായം ലഭിക്കും. രാജ്യത്തുടനീളം തൊഴിൽ ചെയ്യുന്നതിന് അംഗീകാരമുള്ള ദേശീയ നിലവാരമാണ് റെഡ് സീൽ സർട്ടിഫിക്കേഷൻ. 2030-31 വർഷത്തോടെ ഒരു ലക്ഷം വിദഗ്ധ തൊഴിലാളികളെ സൃഷ്ടിക്കുക എന്ന ലക്ഷ്യത്തോടെയാണ് ഈ പദ്ധതി വിഭാവനം ചെയ്തിരിക്കുന്നത്. കൂടാതെ, 15 മുതൽ 30 വയസ്സ് വരെയുള്ള യുവാക്കൾക്ക് തൊഴിൽ മേഖലയിൽ പ്രവേശനം നൽകുന്നതിനായി ശമ്പളത്തോടുകൂടിയ എൻട്രി ലെവൽ ജോലികളും സർക്കാർ ഉറപ്പാക്കും.