സാധാരണക്കാർക്ക് ആശ്വാസമാകുന്ന നിർണ്ണായക പ്രഖ്യാപനങ്ങളുമായി ഫെഡറൽ സർക്കാരിൻ്റെ സ്പ്രിംഗ് ഇക്കണോമിക് അപ്‌ഡേറ്റ് പുറത്ത്

കാനഡയിലെ സാധാരണക്കാരുടെ സാമ്പത്തിക നിലയെ നേരിട്ട് ബാധിക്കുന്ന നിരവധി നിർണ്ണായക പ്രഖ്യാപനങ്ങളുമായി ഫെഡറൽ സർക്കാരിൻ്റെ സ്പ്രിംഗ് ഇക്കണോമിക് അപ്‌ഡേറ്റ് പുറത്തിറങ്ങി. സി.പി.പി (CPP) വിഹിതത്തിലെ കുറവ്, ഇ.ഐ (EI) ആനുകൂല്യങ്ങളുടെ കാലാവധി നീട്ടൽ, മോർട്ട്ഗേജ് ഇൻഷുറൻസ് പരിഷ്കാരങ്ങൾ തുടങ്ങി ജനങ്ങൾക്ക് ആശ്വാസം നൽകുന്ന പദ്ധതികളാണ് ഇതിൽ പ്രധാനമായും ഉൾപ്പെടുത്തിയിരിക്കുന്നത്. 

കാനഡ പെൻഷൻ പ്ലാൻ (CPP) വിഹിതത്തിൽ സർക്കാർ കുറവ് വരുത്തി. നിലവിലുള്ള 9.9 ശതമാനത്തിൽ നിന്നും സി.പി.പി നിരക്ക് 9.5 ശതമാനമായി കുറയും. 2027 ജനുവരി 1 മുതലായിരിക്കും ഇത് പ്രാബല്യത്തിൽ വരുന്നത്. പ്രതിവർഷം 70,000 ഡോളർ വരുമാനമുള്ള ഒരു ജീവനക്കാരന് ഇതിലൂടെ ഏകദേശം 133 ഡോളർ ലാഭിക്കാൻ സാധിക്കും. ജീവനക്കാർക്കൊപ്പം തൊഴിലുടമകൾക്കും ഇതേ തുക ലാഭിക്കാനാകും.

തൊഴിൽ മേഖലയിലും നികുതി രംഗത്തും വലിയ പ്രഖ്യാപനങ്ങളാണ് ഉണ്ടായിരിക്കുന്നത്. സീസണൽ ജോലികൾ ചെയ്യുന്നവർക്ക് അഞ്ച് ആഴ്ച കൂടി അധികമായി ഇ.ഐ ആനുകൂല്യങ്ങൾ ലഭിക്കും. 2028 ഒക്ടോബർ വരെ ഈ ആനുകൂല്യം നീട്ടിയിട്ടുണ്ട്. ജീവനക്കാർക്ക് തങ്ങൾ ജോലി ചെയ്യുന്ന സ്ഥാപനങ്ങളിൽ ട്രസ്റ്റ് വഴി പങ്കാളിത്തം ഉറപ്പാക്കുന്ന പദ്ധതിക്ക് സ്ഥിരമായ നികുതി ഇളവ് അനുവദിച്ചു. ഭിന്നശേഷിയുള്ളവർക്കുള്ള നികുതി ഇളവ് പദ്ധതി കൂടുതൽ രോഗാവസ്ഥകളിലേക്കും ആരോഗ്യ വിദഗ്ധരിലേക്കും വ്യാപിപ്പിച്ചു.

യാത്രക്കാരുടെ പരാതികൾ പരിഹരിക്കുന്നതിന് ഒരു സ്വതന്ത്ര തർക്ക പരിഹാര സംവിധാനം ഏർപ്പെടുത്തും. നിലവിൽ ഏജൻസിക്ക് മുന്നിലുള്ള 96,000-ത്തോളം പരാതികൾ വേഗത്തിൽ തീർപ്പാക്കാനും യാത്രക്കാർക്ക് കൃത്യമായ നഷ്ടപരിഹാരം ഉറപ്പാക്കാനും ഇതിലൂടെ സാധിക്കും. ട്രിപ്ലക്സ്, ഫോർപ്ലക്സ് തുടങ്ങിയ ബഹുനില വീടുകൾ നിർമ്മിക്കുന്നവർക്ക് മോർട്ട്ഗേജ് ഇൻഷുറൻസ് നിയമങ്ങളിൽ ഇളവുകൾ അനുവദിച്ചു. സാമ്പത്തിക തട്ടിപ്പുകളും കുറ്റകൃത്യങ്ങളും തടയുന്നതിൻ്റെ ഭാഗമായി ക്രിപ്റ്റോകറൻസി എടിഎമ്മുകൾ  പൂർണ്ണമായും നിരോധിച്ചു.