സ്വകാര്യ ആരോഗ്യ പരിരക്ഷ: ആൽബർട്ടയ്ക്ക് മുന്നറിയിപ്പുമായി ഫെഡറൽ ആരോഗ്യ മന്ത്രി

ആൽബർട്ട  നടപ്പിലാക്കാൻ ഒരുങ്ങുന്ന പുതിയ ആരോഗ്യ പരിരക്ഷാ നിയമങ്ങൾക്കെതിരെ കർശന മുന്നറിയിപ്പുമായി ഫെഡറൽ ആരോഗ്യ മന്ത്രി മാർഷറി മിഷേൽ. സ്വകാര്യ മേഖലയ്ക്ക് കൂടുതൽ പ്രാധാന്യം നൽകുന്ന ആൽബർട്ടയുടെ നീക്കം കാനഡ ഹെൽത്ത് ആക്ടിൻ്റെ ലംഘനമാകാൻ സാധ്യതയുണ്ടെന്ന് അവർ ചൂണ്ടിക്കാട്ടി. രോഗികൾ ചികിത്സയ്ക്കായി നേരിട്ട് പണം നൽകേണ്ടി വരുന്ന സാഹചര്യം സൃഷ്ടിക്കുന്നത് കാനഡയിലെ പൊതുജനാരോഗ്യ സംവിധാനത്തിൻ്റെ അടിത്തറ ഇളക്കുമെന്നും, പണമുള്ളവർക്ക് മാത്രം മികച്ച ചികിത്സ ലഭിക്കുന്ന സാഹചര്യം അനുവദിക്കില്ലെന്നും മന്ത്രി വ്യക്തമാക്കി. പ്രവിശ്യകൾ സ്വീകരിക്കുന്ന ഇത്തരം നടപടികൾ ഫെഡറൽ ഫണ്ടുകൾ വെട്ടിക്കുറയ്ക്കുന്നതിലേക്ക് നയിക്കുമെന്നും അവർ കൂട്ടിച്ചേർത്തു.

ആരോഗ്യ മേഖലയിലെ പ്രതിസന്ധികൾ പരിഹരിക്കാൻ സ്വകാര്യ ക്ലിനിക്കുകളെ ആശ്രയിക്കുന്നത് സാധാരണക്കാരായ പൗരന്മാർക്ക് തിരിച്ചടിയാകുമെന്ന് ഫെഡറൽ ഗവൺമെൻ്റ് കരുതുന്നു. ഡോക്ടർമാർക്കും നഴ്‌സുമാർക്കും പൊതു സംവിധാനത്തേക്കാൾ കൂടുതൽ വേതനം നൽകി സ്വകാര്യ മേഖല ആകർഷിക്കുന്നത് പൊതു ആശുപത്രികളുടെ പ്രവർത്തനത്തെ ദോഷകരമായി ബാധിക്കുമെന്നാണ് പ്രധാന ആശങ്ക. കാത്തിരിപ്പ് സമയം കുറയ്ക്കാനാണ്  ശ്രമിക്കുന്നതെന്ന് ആൽബർട്ട വാദിക്കുമ്പോഴും, നിയമപരമായ കൃത്യത ഉറപ്പാക്കാത്ത പക്ഷം സാമ്പത്തിക ഉപരോധം നേരിടേണ്ടി വരുമെന്ന സൂചനയാണ് ഓട്ടവ നൽകുന്നത്. ആരോഗ്യ പരിരക്ഷാ രംഗത്തെ സമത്വം ഉറപ്പാക്കാൻ എല്ലാ പ്രവിശ്യകളും കേന്ദ്ര നിയമങ്ങൾ പാലിക്കണമെന്നും മന്ത്രി വ്യക്തമാക്കി