കാൽഗറിയിൽ വാട്ടർ അതോറിറ്റിയുടെ പുതിയ നിയന്ത്രണം: ചെടികൾ നനയ്ക്കുന്നതിന് കർശന സമയക്രമം; ലംഘിച്ചാൽ പിഴ

 

കാൽഗറി നഗരത്തിൽ ജലക്ഷാമം നേരിടുന്നതിൻ്റെ ഭാഗമായി വീടുകളിലും മറ്റും പുറത്ത് ചെടികളും പുൽത്തകിടികളും നനയ്ക്കുന്നതിന്  സിറ്റി കൗൺസിൽ കർശന നിയന്ത്രണം ഏർപ്പെടുത്തി. ഇനി മുതൽ വർഷം മുഴുവൻ ബാധകമാകുന്ന രീതിയിലുള്ള സമയക്രമമാണ് നിശ്ചയിച്ചിരിക്കുന്നത്. വീട്ടുനമ്പർ ഒറ്റയക്കത്തിൽ അവസാനിക്കുന്നവർക്ക് ബുധൻ, വെള്ളി, ഞായർ ദിവസങ്ങളിൽ നനയ്ക്കാം. ഇരട്ടയക്കത്തിൽ അവസാനിക്കുന്നവർക്ക് ചൊവ്വ, വ്യാഴം, ശനി ദിവസങ്ങളാണ് അനുവദിച്ചിരിക്കുന്നത്.

അനുവദിക്കപ്പെട്ട ദിവസങ്ങളിൽ രാത്രി ഏഴ് മണി മുതൽ പിറ്റേന്ന് രാവിലെ 10 മണി വരെ മാത്രമേ നനയ്ക്കാൻ അനുവാദമുള്ളൂ. നിയമം ലംഘിക്കുന്നവരിൽ നിന്ന് 200 ഡോളർ പിഴ ഈടാക്കും. വീട്ടിലെ പച്ചക്കറി കൃഷികൾക്കും പുതുതായി നട്ടുപിടിപ്പിച്ച തൈകൾക്കും ഈ നിയന്ത്രണം ബാധകമല്ല. ഇവ ഏതുസമയത്തും നനയ്ക്കാവുന്നതാണ്. 2040-ഓടെ നഗരത്തിലെ ജല ഉപഭോഗം 20 ശതമാനം കുറയ്ക്കുക എന്ന ലക്ഷ്യത്തോടെയാണ് അധികൃതർ ഈ നടപടി സ്വീകരിച്ചിരിക്കുന്നത്. വേനൽക്കാലത്ത് ജലശേഖരങ്ങളിൽ വെള്ളം കുറയുന്നത് മുൻകൂട്ടി കണ്ടാണ് മുൻകരുതൽ.

നഗരസഭയിൽ ഈ വിഷയത്തിൽ ഭിന്നാഭിപ്രായങ്ങൾ ഉയർന്നെങ്കിലും, ജലസംരക്ഷണം അനിവാര്യമാണെന്ന നിലപാടിലാണ് ഭൂരിഭാഗം കൗൺസിൽ അംഗങ്ങളും വിദഗ്ധരും. കാൽഗറിക്ക് പുറമെ കാനഡയിലെ മറ്റ് അയൽ നഗരങ്ങളിലും സമാനമായ നിയന്ത്രണങ്ങൾ നിലവിലുണ്ട്. നിയമം ലംഘിക്കാതെ സഹകരിക്കണമെന്ന് സിറ്റി കൗൺസിൽ ജനങ്ങളോട് അഭ്യർത്ഥിച്ചു.