75,000 ഡോളറിന്റെ തട്ടിപ്പ്: ലൂസിയാന മേയര് അറസ്റ്റില്; പിന്നില് 'പിശാചാണെന്ന്' ആരോപണം
By: 600002 On: Apr 28, 2026, 12:40 PM
പി പി ചെറിയാന്
ലൂസിയാന: അമേരിക്കയിലെ ലൂസിയാനയിലുള്ള വിന്സ്ബോറോ നഗരത്തിലെ മേയര് ആലീസ് വാലസിനെ (50) സര്ക്കാര് ആനുകൂല്യങ്ങളില് തട്ടിപ്പ് നടത്തിയെന്നാരോപിച്ച് പോലീസ് അറസ്റ്റ് ചെയ്തു. ഏകദേശം 75,000 ഡോളറിന്റെ (ഏകദേശം 62 ലക്ഷം രൂപ) മെഡിക്കെയ്ഡ് ആനുകൂല്യങ്ങള് വ്യാജരേഖ ചമച്ച് കൈപ്പറ്റിയെന്നാണ് ഇവര്ക്കെതിരെയുള്ള കുറ്റം.
തട്ടിപ്പ്: 2021 മുതല് ഇവര് അനധികൃതമായി ആരോഗ്യ ഇന്ഷുറന്സ് ആനുകൂല്യങ്ങള് കൈപ്പറ്റുന്നതായി ലൂസിയാന അറ്റോര്ണി ജനറല് അറിയിച്ചു. മേയര് എന്ന നിലയിലുള്ള ശമ്പളം ലഭിച്ചിട്ടും സാമ്പത്തിക വിവരങ്ങള് മറച്ചുവെച്ച് ആനുകൂല്യങ്ങള് തുടര്ന്നും വാങ്ങി എന്നതാണ് കേസ്.
തന്റെ പുനര്തെരഞ്ഞെടുപ്പ് പ്രചാരണം തകര്ക്കാന് പിശാച് ശ്രമിക്കുകയാണെന്നാണ് അറസ്റ്റിന് പിന്നാലെ ആലീസ് ഫേസ്ബുക്കില് കുറിച്ചത്. തന്നെ അപമാനിക്കാനും ജനവിശ്വാസം തകര്ക്കാനുമുള്ള നീക്കമാണിതെന്നും അവര് ആരോപിച്ചു.
ലൂസിയാന ബ്യൂറോ ഓഫ് ഇന്വെസ്റ്റിഗേഷന് ഇവരെ അറസ്റ്റ് ചെയ്ത് ജയിലിലാക്കി. നിലവില് ആറ് കൗണ്ട് തട്ടിപ്പ് കുറ്റങ്ങളാണ് ചുമത്തിയിരിക്കുന്നത്.
വിന്സ്ബോറോയിലെ ആദ്യ വനിതാ മേയറാണ് ആലീസ് വാലസ്. മെയ് 16-ന് നടക്കാനിരിക്കുന്ന തെരഞ്ഞെടുപ്പില് താന് തന്നെ വിജയിക്കുമെന്നും ഈ ആരോപണങ്ങള് തന്നെ തളര്ത്തില്ലെന്നും അവര് വ്യക്തമാക്കി. എന്നാല്, നികുതിപ്പണം വെട്ടിക്കുന്നവര് ആരായാലും ജയിലില് പോകേണ്ടി വരുമെന്ന് അറ്റോര്ണി ജനറല് ലിസ് മുറില് പ്രതികരിച്ചു.