ജിമ്മി കിമ്മലിനെ പുറത്താക്കണമെന്ന് ട്രംപ്; വൈറ്റ് ഹൗസ് വെടിവെപ്പിന് പിന്നാലെ വിവാദം പുകയുന്നു

പി പി ചെറിയാന്‍

വാഷിംഗ്ടണ്‍: വൈറ്റ് ഹൗസ് കറസ്പോണ്ടന്റ്സ് ഡിന്നറിനിടെയുണ്ടായ വെടിവെപ്പിന് മുന്നോടിയായി നടത്തിയ തമാശകളുടെ പേരില്‍ പ്രശസ്ത ഹാസ്യതാരം ജിമ്മി കിമ്മലിനെ പുറത്താക്കണമെന്ന് പ്രസിഡന്റ് ഡോണാള്‍ഡ് ട്രംപ് ആവശ്യപ്പെട്ടു. കിമ്മലിനെ എബിസി, ഡിസ്‌നി എന്നിവയില്‍ നിന്ന് ഉടനടി പുറത്താക്കണമെന്നാണ് ട്രംപിന്റെ ആവശ്യം.

വിവാദത്തിന് പിന്നില്‍

കഴിഞ്ഞ വ്യാഴാഴ്ച തന്റെ ഷോയ്ക്കിടെ പ്രഥമ വനിതാ മെലാനിയ ട്രംപിനെക്കുറിച്ച് കിമ്മല്‍ നടത്തിയ പരാമര്‍ശമാണ് വിവാദമായത്. മെലാനിയയെ 'പ്രതീക്ഷയോടെ കാത്തിരിക്കുന്ന വിധവയെപ്പോലെ തിളങ്ങുന്നു' എന്നായിരുന്നു കിമ്മല്‍ വിശേഷിപ്പിച്ചത്. ഇത് വെറും തമാശയല്ലെന്നും മറിച്ച് അക്രമത്തിനുള്ള ആഹ്വാനമാണെന്നും ട്രംപ് കുറ്റപ്പെടുത്തി.

കിമ്മലിന്റേത് 'വെറുപ്പും അക്രമവും നിറഞ്ഞ വാചകങ്ങളാണ്' എന്ന് മെലാനിയ ട്രംപ് സോഷ്യല്‍ മീഡിയയിലൂടെ പ്രതികരിച്ചു. ഇത്തരം ആളുകള്‍ക്ക് ഓരോ വൈകുന്നേരവും ജനങ്ങളുടെ വീട്ടിലെത്താന്‍ അവസരം നല്‍കരുതെന്നും അവര്‍ കൂട്ടിച്ചേര്‍ത്തു.

ശനിയാഴ്ച വൈറ്റ് ഹൗസ് ഡിന്നറിനിടെ ട്രംപും മെലാനിയയും ഇരുന്നിരുന്ന വേദിക്ക് സമീപം വെടിവെപ്പ് നടന്നിരുന്നു. ആര്‍ക്കും പരിക്കേറ്റില്ലെങ്കിലും പ്രതിയായ കോള്‍ അലനെ പിടികൂടി വധശ്രമത്തിന് കേസെടുത്തു. സെപ്റ്റംബറില്‍ ചാര്‍ളി കിര്‍ക്കിന്റെ വധവുമായി ബന്ധപ്പെട്ട പരാമര്‍ശങ്ങളുടെ പേരിലും കിമ്മല്‍ സമാനമായ വിമര്‍ശനങ്ങള്‍ നേരിട്ടിരുന്നു.

നിലവില്‍ ഈ വിഷയത്തില്‍ എബിസി ഔദ്യോഗിക പ്രതികരണങ്ങള്‍ ഒന്നും നല്‍കിയിട്ടില്ല.