കാനഡയിലെ കുറ്റവാളികളായ വിദേശികൾക്കെതിരെ നടപടിയില്ലെന്ന് ആക്ഷേപം; താക്കീത് കത്തുകളിൽ ഒതുങ്ങുന്നതായി റിപ്പോർട്ട്

 

കാനഡയിൽ സ്ഥിരതാമസക്കാരായ വിദേശ പൗരന്മാർ ഗുരുതരമായ കുറ്റകൃത്യങ്ങളിൽ ഏർപ്പെടുമ്പോൾ അവരെ നാടുകടത്തുന്നതിന് പകരം കേവലം കർശനമായ താക്കീത് കത്തുകൾ  നൽകി വിട്ടയക്കുന്ന ഇമിഗ്രേഷൻ വകുപ്പിൻ്റെ നടപടിയെ വിമർശിച്ച് നാഷണൽ പോസ്റ്റിൻ്റെ  റിപ്പോർട്ട് . നിയമലംഘനം നടത്തുന്ന വിദേശികളെ പുറത്താക്കുന്നതിന് പകരം ഇത്തരം മൃദുവായ സമീപനം സ്വീകരിക്കുന്നത് രാജ്യത്തെ നിയമസംവിധാനത്തിൻ്റെ പരാജയമാണെന്ന് ലേഖനത്തിൽ  ചൂണ്ടിക്കാട്ടുന്നു. കുറ്റകൃത്യങ്ങൾ ആവർത്തിക്കുന്നവർക്ക് ഇത്തരം മുന്നറിയിപ്പുകൾ ഫലപ്രദമാകുന്നില്ലെന്നും ഇത് പൊതുജനസുരക്ഷയെ ബാധിക്കുമെന്നും റിപ്പോർട്ടിൽ വ്യക്തമാക്കുന്നു.

ഇമിഗ്രേഷൻ ആൻ്റ് റെഫ്യൂജി പ്രൊട്ടക്ഷൻ ആക്ട് പ്രകാരം ഇത്തരം കുറ്റവാളികളെ പുറത്താക്കാൻ നിയമമുണ്ടെങ്കിലും, പ്രായോഗിക തലത്തിൽ ഇത് നടപ്പിലാക്കുന്നതിൽ കാനഡ പരാജയപ്പെടുകയാണെന്നാണ് ലേഖനത്തിൽ പറയുന്നത് . ഭരണകൂടത്തിൻ്റെ ഈ ഉദാരസമീപനം കുറ്റവാളികൾക്ക് ഭയമില്ലാത്ത സാഹചര്യം ഒരുക്കുന്നുവെന്നും ഇത് കനേഡിയൻ ഇമിഗ്രേഷൻ സിസ്റ്റത്തിൻ്റെ വിശ്വാസ്യതയെ തന്നെ ചോദ്യം ചെയ്യുന്നതായും റിപ്പോർട്ട് വിലയിരുത്തുന്നു. നാടുകടത്തൽ നടപടികൾ കർശനമാക്കാതെ ഇത്തരം താക്കീതുകൾ കൊണ്ട് മാത്രം കുറ്റകൃത്യങ്ങൾ തടയാനാവില്ലെന്നാണ് പ്രധാന വിമർശനം.

കാനഡയുടെ സുരക്ഷാ മാനദണ്ഡങ്ങളിൽ വരുത്തുന്ന ഇത്തരം വിട്ടുവീഴ്ചകൾ അന്താരാഷ്ട്ര തലത്തിൽ തന്നെ ചർച്ചയാകുന്നുണ്ട്. കുറ്റകൃത്യങ്ങളിൽ ഏർപ്പെടുന്നവർക്ക് കൃത്യമായ ശിക്ഷ ലഭിക്കുന്നുണ്ടെന്ന് ഉറപ്പാക്കാൻ നിയമപരിഷ്കാരം അത്യാവശ്യമാണെന്ന് ലേഖനം അഭിപ്രായപ്പെടുന്നു. സാധാരണക്കാരായ പൗരന്മാരുടെ സുരക്ഷ ഉറപ്പാക്കുന്നതിനേക്കാൾ മുൻഗണന കുറ്റവാളികളുടെ അവകാശങ്ങൾ സംരക്ഷിക്കുന്നതിനാണോ നൽകുന്നത് എന്ന ചോദ്യവും ഈ റിപ്പോർട്ട് ഉയർത്തുന്നുണ്ട്.