കാനഡയെ നടുക്കിയ ബസ് അപകടത്തിന് കാരണക്കാരനായ ട്രക്ക് ഡ്രൈവർ ജസ്കിരാത് സിംഗ് സിദ്ദുവിൻ്റെ നാടുകടത്തൽ കോടതി തടഞ്ഞു

 

2018-ൽ കാനഡയെ നടുക്കിയ ഹംബോൾട്ട് ബ്രോങ്കോസ് ബസ് അപകടത്തിന് കാരണക്കാരനായ ട്രക്ക് ഡ്രൈവർ ജസ്കിരത് സിംഗ് സിദ്ദുവിൻ്റെ നാടുകടത്തൽ ഫെഡറൽ കോടതി താൽക്കാലികമായി തടഞ്ഞു. 16 പേരുടെ മരണത്തിനിടയാക്കിയ അപകടത്തിൽ ശിക്ഷിക്കപ്പെട്ട സിദ്ദുവിനെ ഇന്ത്യയിലേക്ക് തിരിച്ചയക്കാനുള്ള നീക്കമാണ് കോടതി ഇടപെടലിലൂടെ നിലച്ചിരിക്കുന്നത്. 

2018 ഏപ്രിലിൽ സിദ്ദു ഓടിച്ചിരുന്ന ട്രക്ക്, ഹംബോൾട്ട് ബ്രോങ്കോസ് ഹോക്കി ടീം സഞ്ചരിച്ചിരുന്ന ബസുമായി കൂട്ടിയിടിച്ച് 16 പേർ മരിക്കുകയും 13 പേർക്ക് പരിക്കേൽക്കുകയും ചെയ്തു. അപകടത്തെത്തുടർന്ന് 2019-ൽ സിദ്ദുവിന് എട്ട് വർഷം തടവുശിക്ഷ ലഭിച്ചു. 2023-ൽ ഇയാൾക്ക് പരോൾ അനുവദിച്ചിരുന്നു. 2024-ൽ സിദ്ദുവിന് കാനഡയിലെ പെർമനൻ്റ് റെസിഡൻ്റ് പദവി നഷ്ടമായി. ഇതേത്തുടർന്ന് ഇയാളെ ഇന്ത്യയിലേക്ക് നാടുകടത്താൻ ഇമിഗ്രേഷൻ ബോർഡ് ഉത്തരവിട്ടു.

തിങ്കളാഴ്ച പുലർച്ചെ നാടുകടത്താനിരിക്കെയാണ് ഫെഡറൽ കോടതി ഈ നടപടി താൽക്കാലികമായി സ്റ്റേ ചെയ്തത്. സിദ്ദുവിൻ്റെ അഭിഭാഷകർ ഉന്നയിച്ച ചില മാനുഷിക കാരണങ്ങൾ കോടതി കണക്കിലെടുത്തു. സിദ്ദുവിൻ്റെ മകന് അപൂർവ്വമായ ശ്വാസകോശ രോഗമുണ്ട്. ഇന്ത്യയിലെ വായുമലിനീകരണം കുട്ടിയുടെ ജീവന് ഭീഷണിയാകുമെന്ന് ഡോക്ടർമാർ മുന്നറിയിപ്പ് നൽകി. നാടുകടത്തപ്പെട്ടാൽ സിദ്ദു ആത്മഹത്യ ചെയ്യാൻ സാധ്യതയുണ്ടെന്നും അദ്ദേഹത്തിൻ്റെ മാനസിക നില മോശമാണെന്നും അഭിഭാഷകർ വാദിച്ചു.

എന്നാൽ 16 പേരുടെ മരണത്തിന് കാരണക്കാരനായ കുറ്റവാളിയെ എത്രയും വേഗം നാടുകടത്തണമെന്നാണ് സർക്കാർ അഭിഭാഷകർ വാദിച്ചത്.  മെഡിക്കൽ റിപ്പോർട്ടുകൾ നാടുകടത്തൽ തടയാനുള്ള മതിയായ കാരണങ്ങളല്ലെന്നും സർക്കാർ കോടതിയെ അറിയിച്ചു.  അപകടത്തിൽ മരിച്ചവരുടെ കുടുംബാംഗങ്ങളിൽ ചിലർ സിദ്ദുവിനോട് ക്ഷമിച്ചപ്പോൾ, മറ്റുചിലർ അദ്ദേഹം ശിക്ഷ അനുഭവിക്കണമെന്നും നാടുകടത്തണമെന്നും ഉറച്ചു വിശ്വസിക്കുന്നവരാണ്. ഇത്തരം തുടർച്ചയായ കോടതി നടപടികൾ തങ്ങളുടെ പഴയ മുറിവുകൾ വീണ്ടും തുറക്കുകയാണെന്ന് കുടുംബങ്ങൾ പറഞ്ഞു. മറ്റൊരു കേസിൽ അന്തിമ തീരുമാനം വരുന്നത് വരെ സിദ്ദുവിന് കാനഡയിൽ തുടരാം. ഇതിന് മാസങ്ങൾ എടുത്തേക്കുമെന്നാണ് നിയമവിദഗ്ധർ കരുതുന്നത്.