കുട്ടികൾക്ക് സോഷ്യൽ മീഡിയയും AI ചാറ്റ്‌ബോട്ടുകളും നിരോധിക്കാനൊരുങ്ങി മാനിറ്റോബ പ്രവിശ്യ

കാനഡയിൽ ആദ്യമായി കുട്ടികൾക്ക് സോഷ്യൽ മീഡിയയും AI ചാറ്റ്‌ബോട്ടുകളും നിരോധിക്കാനൊരുങ്ങി മാനിറ്റോബ പ്രവിശ്യ. കുട്ടികളുടെ മാനസികാരോഗ്യം സംരക്ഷിക്കുന്നതിനും ഓൺലൈൻ ചൂഷണങ്ങൾ തടയുന്നതിനുമാണ് ഈ സുപ്രധാന നീക്കമെന്ന് പ്രീമിയർ വാബ് കിന്യൂ പ്രഖ്യാപിച്ചു.  കുട്ടികൾക്ക് സോഷ്യൽ മീഡിയ പ്ലാറ്റ്‌ഫോമുകളും AI ചാറ്റ്‌ബോട്ടുകളും ഉപയോഗിക്കുന്നത് മാനിറ്റോബ പൂർണ്ണമായും നിരോധിക്കും. ഇതോടെ കാനഡയിൽ ഇത്തരമൊരു നിയമം കൊണ്ടുവരുന്ന ആദ്യ പ്രവിശ്യയായി മാനിറ്റോബ മാറും. കുട്ടികളുടെ സുരക്ഷ തൻ്റെ ഏറ്റവും വലിയ ഉത്തരവാദിത്തമാണെന്ന് വാബ് കിന്യൂ വ്യക്തമാക്കി.

സോഷ്യൽ മീഡിയ ഉപയോഗം കുട്ടികളിൽ ഉത്കണ്ഠ, വിഷാദം, ആത്മഹത്യാ പ്രവണത എന്നിവ വർദ്ധിപ്പിക്കുന്നതായി പ്രീമിയർ ചൂണ്ടിക്കാട്ടി. ഉപയോക്താക്കളെ അടിമകളാക്കുന്ന രീതിയിലാണ് ഈ പ്ലാറ്റ്‌ഫോമുകൾ രൂപകൽപ്പന ചെയ്തിരിക്കുന്നത്. പെൺകുട്ടികളെ കടത്തുന്നതിനും മറ്റ് ചൂഷണങ്ങൾക്കും സോഷ്യൽ മീഡിയ ഇടയാക്കുന്നുണ്ടെന്ന് അദ്ദേഹം മുന്നറിയിപ്പ് നൽകി. കുട്ടികൾക്ക് സ്ക്രീനുകളിൽ നിന്ന് മോചനം നൽകി, അവർക്ക് പുറത്ത് കളിക്കാനുള്ള സാഹചര്യം ഒരുക്കുക എന്നതാണ് ഇതിൻ്റെ ലക്ഷ്യം.

കഴിഞ്ഞ ഡിസംബറിൽ 16 വയസ്സിൽ താഴെയുള്ളവർക്ക് ഓസ്‌ട്രേലിയ സോഷ്യൽ മീഡിയ നിരോധിച്ചിരുന്നു. കാനഡയിലെ മറ്റ് പ്രവിശ്യകളായ ഒൻ്റാരിയോയും സസ്കാച്ചവനും സമാനമായ നടപടികളെക്കുറിച്ച് ആലോചിക്കുന്നുണ്ട്. ഏത് പ്രായത്തിലുള്ള കുട്ടികൾക്കാണ് നിരോധനം ബാധകമെന്ന കാര്യത്തിൽ വ്യക്തത വന്നിട്ടില്ല.  ആഗോളതലത്തിൽ പ്രവർത്തിക്കുന്ന കമ്പനികളെ എങ്ങനെ നിയന്ത്രിക്കുമെന്നതും പ്രായം കൃത്യമായി പരിശോധിക്കാനുള്ള സാങ്കേതിക തടസ്സങ്ങളും വലിയ വെല്ലുവിളികളാണ്. എങ്കിലും, സർവ്വേകൾ പ്രകാരം ഭൂരിഭാഗം കനേഡിയൻ മാതാപിതാക്കളും (ഏകദേശം 70%) ഈ തീരുമാനത്തെ പിന്തുണയ്ക്കുന്നുണ്ട്. വരും ആഴ്ചകളിൽ നിയമസഭയിൽ ഇത് സംബന്ധിച്ച കൂടുതൽ ചർച്ചകൾ നടക്കും.