കാനഡ ലൈഫ് ഇൻഷുറൻസ് കമ്പനിയിൽ സൈബർ ആക്രമണം: 70,000 ഉപഭോക്താക്കളുടെ വിവരങ്ങൾ ചോർന്നു

പ്രമുഖ ഇൻഷുറൻസ് സേവന ദാതാക്കളായ കാനഡ ലൈഫിൻ്റെ  ഐടി ശൃംഖലയിൽ ഉണ്ടായ സൈബർ സുരക്ഷാ വീഴ്ചയിൽ ഏകദേശം 70,000 ഉപഭോക്താക്കളുടെ സ്വകാര്യ വിവരങ്ങൾ ചോർന്നതായി കമ്പനി സ്ഥിരീകരിച്ചു. ഒരു ജീവനക്കാരൻ്റെ അക്കൗണ്ട് വഴി കമ്പനിയുടെ ചില ആപ്ലിക്കേഷനുകളിൽ അനധികൃതമായി കടന്നുകയറിയാണ് ഹാക്കർമാർ വിവരങ്ങൾ ചോർത്തിയത്. പേര്, വിലാസം, ജന്മതീയതി, ശമ്പള വിവരങ്ങൾ എന്നിവയാണ് ചോർത്തപ്പെട്ട ഡാറ്റയിലുള്ളത്. എന്നാൽ തങ്ങളുടെ ആകെയുള്ള 1.4 കോടി ഉപഭോക്താക്കളിൽ 0.5 ശതമാനത്തിൽ താഴെ ആളുകളെ മാത്രമേ ഇത് ബാധിച്ചിട്ടുള്ളൂ എന്നും, പ്രധാനമായും ഒരു കോർപ്പറേറ്റ് ക്ലയൻ്റിൻ്റെ വിവരങ്ങളാണ് നഷ്ടമായതെന്നും കമ്പനി വക്താവ് വ്യക്തമാക്കി.

സുരക്ഷാ നടപടികളും അന്വേഷണവും സംഭവം ശ്രദ്ധയിൽപ്പെട്ടയുടൻ തന്നെ അധികൃതരെ വിവരമറിയിക്കുകയും സൈബർ സുരക്ഷാ വിദഗ്ധരുടെ സഹായത്തോടെ അന്വേഷണം ആരംഭിക്കുകയും ചെയ്തതായി കമ്പനി അറിയിച്ചു. നിലവിൽ ഭീഷണി നിയന്ത്രണവിധേയമാണെന്നും സേവനങ്ങൾ പുനഃസ്ഥാപിച്ചതായും അധികൃതർ കൂട്ടിച്ചേർത്തു. ബാധിക്കപ്പെട്ട ഉപഭോക്താക്കളെ നേരിട്ട് വിവരമറിയിക്കുമെന്നും അവർക്ക് സൗജന്യ ക്രെഡിറ്റ് മോണിറ്ററിംഗ് പരിരക്ഷ നൽകുമെന്നും കാനഡ ലൈഫ് ഉറപ്പുനൽകി. ഏകദേശം 5,00,000 ഡോളർ മോചനദ്രവ്യം ഹാക്കർമാർ ആവശ്യപ്പെട്ടതായി റിപ്പോർട്ടുകൾ ഉണ്ടെങ്കിലും കമ്പനി ഇത് ഔദ്യോഗികമായി സ്ഥിരീകരിച്ചിട്ടില്ല. കാനഡയ്ക്ക് പുറത്തുള്ള ജർമ്മനി, അയർലൻഡ് തുടങ്ങിയ രാജ്യങ്ങളിലെ കമ്പനിയുടെ പ്രവർത്തനങ്ങളെ ഈ സൈബർ ആക്രമണം ബാധിച്ചിട്ടില്ല.