ടൊറൻ്റോ പ്രീമിയം ഔട്ട്‌ലെറ്റിൽ പോക്കറ്റടി സംഘം സജീവം: ജാഗ്രത പാലിക്കാൻ പോലീസ് നിർദ്ദേശം

 

കാനഡയിലെ പ്രശസ്തമായ ടൊറൻ്റോ പ്രീമിയം ഔട്ട്‌ലെറ്റിൽ ഷോപ്പിംഗിനെത്തുന്നവരെ പോക്കറ്റടി സംഘങ്ങൾ ലക്ഷ്യമിടുന്നതായി പോലീസിൻ്റെ മുന്നറിയിപ്പ്. ഈ വർഷം മാത്രം ഹാൾട്ടൺ ഹിൽസ് മാളിൽ നിന്ന് 45 ഓളം മോഷണക്കേസുകളാണ് റിപ്പോർട്ട് ചെയ്തിരിക്കുന്നത്. സംഘടിതമായി എത്തുന്ന മോഷണ സംഘങ്ങളാണ് ഇതിന് പിന്നിലെന്ന് പോലീസ് കണ്ടെത്തി.

രണ്ടോ അതിലധികമോ ആളുകൾ അടങ്ങുന്ന സംഘമാണ് മോഷണം നടത്തുന്നത്. ഒരാൾ ശ്രദ്ധ തിരിക്കുമ്പോൾ മറ്റൊരാൾ പോക്കറ്റിൽ നിന്നോ ബാഗിൽ നിന്നോ ഫോണും പഴ്സും കവരുകയാണ് പതിവ്. ഏപ്രിൽ 11-ന് നടന്ന ഒരു മോഷണത്തിൻ്റെ ദൃശ്യങ്ങൾ പോലീസ് പുറത്തുവിട്ടു. വസ്ത്രങ്ങൾ നോക്കുന്നതിനിടയിൽ അതിവിദഗ്ദ്ധമായി ഒരു സ്ത്രീയുടെ ജാക്കറ്റിൽ നിന്ന് മൊബൈൽ ഫോൺ മോഷ്ടിക്കുന്നത് ദൃശ്യങ്ങളിൽ വ്യക്തമാണ്. സെക്കൻ്റുകൾക്കുള്ളിലാണ് ഇവർ മോഷണം പൂർത്തിയാക്കുന്നത്.

കഴിഞ്ഞ മാർച്ചിൽ നടന്ന മറ്റൊരു മോഷണവുമായി ബന്ധപ്പെട്ട് ടൊറൻ്റോ സ്വദേശിയായ ഒരാളെയും മോൺട്രിയൽ സ്വദേശിനിയായ ഒരു യുവതിയെയും പോലീസ് അറസ്റ്റ് ചെയ്തിട്ടുണ്ട്. 2025 നവംബർ മുതൽ ഇതുവരെ എഴുപതിലധികം ഫോണുകളാണ് മാളിൽ നിന്ന് മോഷണം പോയത്. തിരക്കേറിയ സ്ഥലങ്ങളിൽ ബാഗുകളും മൊബൈൽ ഫോണുകളും സുരക്ഷിതമായി വയ്ക്കണമെന്ന് പോലീസ് നിർദ്ദേശിച്ചു.

ഷോപ്പിംഗിനിടയിൽ സംശയാസ്പദമായ രീതിയിൽ ആരെങ്കിലും ശ്രദ്ധയിൽപ്പെട്ടാൽ ഉടൻ തന്നെ മാൾ സുരക്ഷാ ഉദ്യോഗസ്ഥരെയോ പോലീസിനെയോ അറിയിക്കണമെന്ന് അധികൃതർ ആവശ്യപ്പെട്ടു. പുറത്തുവിട്ട സിസിടിവി ദൃശ്യങ്ങളിലെ പ്രതികളെ തിരിച്ചറിയാൻ ജനങ്ങളുടെ സഹായവും പോലീസ് തേടിയിട്ടുണ്ട്.