ആൽബർട്ടയിൽ ഇനി ക്ലോക്കിലെ സമയ മാറ്റം വേണ്ട: 'ആൽബർട്ട സമയം' വരുന്നു

വർഷത്തിൽ രണ്ടുതവണ ക്ലോക്കിലെ സമയം മാറ്റുന്ന പതിവ് ആൽബർട്ട പ്രവിശ്യ അവസാനിപ്പിക്കുന്നു. ഇതുസംബന്ധിച്ച പുതിയ ബില്ല് സർക്കാർ അവതരിപ്പിച്ചു. പുതിയ മാറ്റം നടപ്പിലായാൽ 2026 നവംബർ ഒന്ന് മുതൽ ആൽബർട്ടയിൽ സ്ഥിരമായ ഒരു സമയക്രമം നിലവിൽ വരും. 'ആൽബർട്ട ടൈം'  എന്നാണ് ഈ പുതിയ രീതി അറിയപ്പെടുക.

വസന്തകാലത്തും ശരത്കാലത്തും ക്ലോക്കിലെ സൂചികൾ മാറ്റി സമയം ക്രമീകരിക്കുന്ന രീതി ഇനി ഉണ്ടാകില്ല. പകരം 'ഡേലൈറ്റ് ടൈം' സ്ഥിരമായി നിലനിർത്തും. വൈകുന്നേരങ്ങളിൽ കൂടുതൽ സമയം വെളിച്ചം ലഭിക്കുമെന്നതാണ് ഇതിൻ്റെ പ്രധാന ഗുണം. ജോലി കഴിഞ്ഞു വരുന്നവർക്കും കായിക വിനോദങ്ങളിൽ ഏർപ്പെടുന്നവർക്കും ഇത് സഹായകമാകും. ശൈത്യകാലത്ത് രാവിലെകളിൽ വെളിച്ചം വരാൻ വൈകും. ഉദാഹരണത്തിന്, ഡിസംബർ മാസത്തിൽ എഡ്മൻ്റണിൽ രാവിലെ 10 മണിയോടെ മാത്രമേ സൂര്യൻ ഉദിക്കൂ. ഇത് സ്കൂളിൽ പോകുന്ന കുട്ടികളുടെ സുരക്ഷയെ ബാധിക്കുമെന്ന് ആശങ്കയുണ്ട്.

ആൽബർട്ടയുടെ ഈ തീരുമാനത്തെ തുടർന്ന് വടക്കുപടിഞ്ഞാറൻ കാനഡയിലെ മറ്റ് ഭാഗങ്ങളും സമാനമായ മാറ്റത്തിന് ഒരുങ്ങുകയാണ്. യൂക്കോൺ, ബ്രിട്ടീഷ് കൊളംബിയ എന്നീ പ്രവിശ്യകൾ നേരത്തെ തന്നെ ഈ രീതിയിലേക്ക് മാറിയിരുന്നു. ഒൻ്റാരിയോ പോലുള്ള പ്രവിശ്യകൾ നിയമം പാസാക്കിയെങ്കിലും അയൽ പ്രവിശ്യകളുടെ തീരുമാനത്തിനായി കാത്തിരിക്കുകയാണ്.