ഇല്ഹാന് ഒമറിന്റെ ഭര്ത്താവിന്റെ വൈനറി പൂട്ടി; സ്വത്ത് വിവരങ്ങളില് പൊരുത്തക്കേടെന്ന് ആരോപണം
By: 600002 On: Apr 24, 2026, 7:51 AM
പി പി ചെറിയാന്
കാലിഫോര്ണിയ: അമേരിക്കന് കോണ്ഗ്രസ് അംഗം ഇല്ഹാന് ഒമറിന്റെ ഭര്ത്താവ് ടിം മൈനറ്റിന്റെ ഉടമസ്ഥതയിലുള്ള കാലിഫോര്ണിയയിലെ വൈനറി പൂട്ടി. ഒമറിന്റെ സ്വത്ത് വിവരങ്ങളില് വലിയ വര്ദ്ധനവ് രേഖപ്പെടുത്തിയത് റിപ്പബ്ലിക്കന് പാര്ട്ടി അംഗങ്ങളുടെ കടുത്ത പരിശോധനയ്ക്ക് ഇടയാക്കിയ സാഹചര്യത്തിലാണ് ഈ നീക്കം.
2024-ലെ വാര്ഷിക ഫയലിംഗില് തന്റെ ഭര്ത്താവിന് 6 ദശലക്ഷം മുതല് 30 ദശലക്ഷം ഡോളര് വരെ മൂല്യമുള്ള ആസ്തിയുണ്ടെന്നാണ് ഇല്ഹാന് ഒമര് ആദ്യം രേഖപ്പെടുത്തിയിരുന്നത്. എന്നാല് തൊട്ടുപിന്നാലെ ഇത് വലിയ വിവാദമായി.
വിവാദങ്ങള്ക്കും അന്വേഷണങ്ങള്ക്കും പിന്നാലെ ഒമര് ഈ കണക്കുകള് തിരുത്തി. പുതിയ ഫയലിംഗ് പ്രകാരം ഈ ആസ്തി പൂജ്യം ('0') ആയി കുറച്ചു. അക്കൗണ്ടന്റിന് സംഭവിച്ച പിശകാണെന്നും തന്റെ ഭര്ത്താവ് കോടീശ്വരനല്ലെന്നുമാണ് ഒമറിന്റെ വിശദീകരണം.
സാമ്പത്തിക ക്രമക്കേട് ആരോപണങ്ങളും കേസുകളും നിലനില്ക്കുന്നതിനിടെ ഏപ്രില് 4-ഓടെ ഈ വൈനറി ഔദ്യോഗികമായി പ്രവര്ത്തനം അവസാനിപ്പിച്ചു.
ഡോണാള്ഡ് ട്രംപ് ഉള്പ്പെടെയുള്ള റിപ്പബ്ലിക്കന് നേതാക്കള് ഒമറിനെതിരെ രംഗത്തെത്തിയിട്ടുണ്ട്. ഇത് വെറുമൊരു അക്കൗണ്ടിംഗ് പിശകല്ലെന്നും അഴിമതി മറയ്ക്കാനുള്ള ശ്രമമാണെന്നുമാണ് ഇവരുടെ ആരോപണം. നിലവില് ഹൗസ് കമ്മിറ്റികള് ഈ വിഷയത്തില് അന്വേഷണം തുടരുകയാണ്.
താന് ഭര്ത്താവിന്റെ ബിസിനസ് കാര്യങ്ങളില് ഇടപെടാറില്ലെന്നും, വിവരങ്ങള് കൃത്യമല്ലാത്തതിനാലാണ് ഫയലിംഗില് മാറ്റം വരുത്തിയതെന്നും ഇല്ഹാന് ഒമറിന്റെ വക്താവ് അറിയിച്ചു.