സാഡിൽറിഡ്ജ് വെടിവെപ്പ്: പഞ്ചാബ് സ്വദേശിയുൾപ്പടെ രണ്ട് പേർക്കെതിരെ കുറ്റം ചുമത്തി, ഒരാൾക്കായി തിരച്ചിൽ തുടരുന്നു

നോർത്ത് ഈസ്റ്റ് കാൽഗറിയിലെ സാഡിൽറിഡ്ജിൽ നടന്ന ഭീഷണിപ്പെടുത്തി പണം തട്ടൽ  കേസുമായി ബന്ധപ്പെട്ട വെടിവെപ്പിൽ രണ്ട് യുവാക്കൾക്കെതിരെ പോലീസ് കുറ്റം ചുമത്തി. ഫെബ്രുവരി 22-ന് പുലർച്ചെ ഒരു വീടിന് നേരെ നടന്ന വെടിവെപ്പുമായി ബന്ധപ്പെട്ട് 21 വയസ്സുകാരനായ പഞ്ചാബി കരൺബീർ സിംഗിനെ പോലീസ് അറസ്റ്റ് ചെയ്ത് കോടതിയിൽ ഹാജരാക്കി. ഇതേ വീട്ടിൽ തന്നെ മാർച്ച് 4-ന് വീണ്ടും വെടിവെപ്പ് നടന്നിരുന്നു.

മാർച്ച് ഏഴിന് നടത്തിയ ഒരു വാഹന പരിശോധനയിൽ ലഭിച്ച തെളിവുകളാണ് പ്രതികളെ തിരിച്ചറിയാൻ പോലീസിനെ സഹായിച്ചത്. എഡ്മൻ്റൺ പോലീസ് സർവീസ്, കാനഡ ബോർഡർ സർവീസസ് ഏജൻസി എന്നിവയുടെ സഹകരണത്തോടെയാണ് നിലവിൽ അന്വേഷണം പുരോഗമിക്കുന്നത്. ഈ കേസിൽ ഉൾപ്പെട്ട മൂന്നാമത്തെ പ്രതിയായ 22 വയസ്സുകാരൻ ജർമ്മൻജീത് സിംഗിനായി പോലീസ് തിരച്ചിൽ ഊർജിതമാക്കിയിരിക്കുകയാണ്.

2025 ജനുവരി മുതൽ കാൽഗറിയിൽ ഇത്തരത്തിലുള്ള 41 പണം തട്ടൽ ശ്രമങ്ങൾ റിപ്പോർട്ട് ചെയ്യപ്പെട്ടിട്ടുണ്ടെന്നും ഇതിൽ 17 എണ്ണത്തിൽ വെടിവെപ്പ് നടന്നതായും പോലീസ് അറിയിച്ചു. കാനഡയിലുടനീളം ഇത്തരം കുറ്റകൃത്യങ്ങൾ വർധിച്ചു വരികയാണെങ്കിലും, കാൽഗറിയിൽ ഇതുവരെ ആർക്കും പരിക്കേറ്റതായി റിപ്പോർട്ടുകളില്ല. ഒളിവിൽ കഴിയുന്ന പ്രതിയെക്കുറിച്ച് എന്തെങ്കിലും വിവരം ലഭിക്കുന്നവർ 403-266-1234 എന്ന നമ്പറിലോ ക്രൈം സ്റ്റോപ്പേഴ്സ് വഴിയോ പോലീസിനെ അറിയിക്കണമെന്ന് അധികൃതർ അഭ്യർത്ഥിച്ചു.