മെക്സിക്കോയിലെ പിരമിഡ് വളപ്പിൽ വെടിവെയ്പ്പ്: കനേഡിയൻ സ്വദേശിനി കൊല്ലപ്പെട്ടു

 
ലോകപ്രശസ്തമായ മെക്സിക്കോയിലെ തിയോത്തിവാക്കൻ പിരമിഡ് വളപ്പിലുണ്ടായ വെടിവെയ്പ്പിൽ കനേഡിയൻ സ്വദേശിനിയായ വിനോദസഞ്ചാരി കൊല്ലപ്പെട്ടു.  ഏപ്രിൽ 20, തിങ്കളാഴ്ചയായിരുന്നു നാടിനെ നടുക്കിയ ഈ സംഭവം. അക്രമി സംഭവസ്ഥലത്തുതന്നെ സ്വയം വെടിവെച്ച് മരിച്ചു. കനേഡിയൻ യുവതിയും അക്രമിയും ഉൾപ്പെടെ രണ്ട് പേരാണ് സംഭവത്തിൽ കൊല്ലപ്പെട്ടത്. വെടിവെയ്പ്പിൽ നാല് പേർക്ക് പരിക്കേറ്റു. പരിഭ്രാന്തിപ്പെട്ട് ഓടുന്നതിനിടെ വീണ് മറ്റ് രണ്ട് പേർക്കും പരിക്കേറ്റിട്ടുണ്ട്. പരിക്കേറ്റവരെയെല്ലാം ഉടൻ തന്നെ ആശുപത്രിയിൽ പ്രവേശിപ്പിച്ചു.

മെക്സിക്കൻ പ്രസിഡന്റ് ക്ലോഡിയ ഷീൻബോം സംഭവത്തിൽ അനുശോചനം രേഖപ്പെടുത്തി. കനേഡിയൻ എംബസിയുമായി ബന്ധപ്പെട്ടുവരികയാണെന്നും സംഭവത്തിൽ സമഗ്രമായ അന്വേഷണം നടത്തുമെന്നും അവർ ഉറപ്പുനൽകി. ദശലക്ഷക്കണക്കിന് സഞ്ചാരികൾ എത്തുന്ന  Pyramid of the Sun, Pyramid of the Moon എന്നിവ സ്ഥിതി ചെയ്യുന്ന ഈ പ്രദേശം മെക്സിക്കോയിലെ ഏറ്റവും സുരക്ഷിതമായ ഇടങ്ങളിലൊന്നായാണ് കരുതപ്പെട്ടിരുന്നത്. എന്നാൽ ഈ സംഭവം വിനോദസഞ്ചാര കേന്ദ്രങ്ങളിലെ സുരക്ഷയെക്കുറിച്ച് പുതിയ ചോദ്യങ്ങൾ ഉയർത്തിയിട്ടുണ്ട്.

അക്രമിയുടെ ലക്ഷ്യമെന്തായിരുന്നുവെന്നും സുരക്ഷാ വീഴ്ചകൾ ഉണ്ടായോ എന്നും മെക്സിക്കൻ അധികൃതർ അന്വേഷിച്ചു വരികയാണ്. കൊല്ലപ്പെട്ട യുവതിയുടെ കുടുംബത്തിന് ആവശ്യമായ സഹായങ്ങൾ കനേഡിയൻ എംബസി ഉറപ്പാക്കുന്നുണ്ട്.