ഓൺലൈൻ സ്പോർട്സ് ബെറ്റിംഗ് മേഖല സ്വകാര്യ കമ്പനികൾക്കായി തുറന്ന് ആൽബർട്ട; ജൂലൈ മുതൽ പ്രവർത്തനം തുടങ്ങും

 

ആൽബർട്ട പ്രവിശ്യയിൽ 2026 ജൂലൈ മുതൽ ഓൺലൈൻ സ്പോർട്സ് ബെറ്റിംഗ് മേഖലയിൽ സ്വകാര്യ കമ്പനികൾക്ക് അനുമതി നൽകാൻ സർക്കാർ തീരുമാനിച്ചു. നിലവിൽ ചൂതാട്ടത്തിൽ ഏർപ്പെടുന്നവർക്ക് സുരക്ഷിതവും നിയന്ത്രിതവുമായ സാഹചര്യം ഒരുക്കുകയാണ് ലക്ഷ്യമെന്ന് സർക്കാർ വ്യക്തമാക്കി.'ഡ്രാഫ്റ്റ് കിംഗ്സ്' (DraftKings), 'ദ സ്കോർ ബെറ്റ്' (theScore Bet) തുടങ്ങിയ പ്രമുഖ കമ്പനികൾ ആൽബർട്ടയിൽ പ്രവർത്തനം തുടങ്ങാൻ തയ്യാറെടുക്കുകയാണ്. ആകെ 32 കമ്പനികൾ അപേക്ഷ നൽകിയതിൽ 20 എണ്ണം ഇതിനകം ഡെപ്പോസിറ്റ് തുക കെട്ടിവച്ചിട്ടുണ്ട്.

പുതിയ ചൂതാട്ടക്കാരെ പ്രോത്സാഹിപ്പിക്കാനല്ല, മറിച്ച് നിലവിലുള്ളവരെ സുരക്ഷിതമായ പ്ലാറ്റ്‌ഫോമുകളിലേക്ക് കൊണ്ടുവരികയാണ് പുതിയ തീരുമാനത്തിലൂടെ ലക്ഷ്യമിടുന്നതെന്ന് മന്ത്രി ഡെയ്‌ൽ നാലി പറഞ്ഞു. "ഇന്ന് ചൂതാട്ടം നടത്താത്തവർ പുതിയതായി തുടങ്ങരുത്" എന്നും അദ്ദേഹം മുന്നറിയിപ്പ് നൽകി.

എന്നാൽ ഓൺലൈൻ പ്ലാറ്റ്‌ഫോമുകൾ എളുപ്പത്തിൽ ലഭ്യമാകുന്നത് ചൂതാട്ടത്തിന് അടിമപ്പെടാൻ കാരണമാകുമെന്ന് വിദഗ്ധർ മുന്നറിയിപ്പ് നൽകി. പ്രത്യേകിച്ച് ഐസ് ഹോക്കി പ്ലേ ഓഫ് സീസണുകളിൽ ബെറ്റിംഗ് വർധിക്കാൻ സാധ്യതയുണ്ടെന്നും അവർ ചൂണ്ടിക്കാട്ടി. ബെറ്റിംഗിന് പരിധി നിശ്ചയിക്കുക, വരുമാനത്തിൻ്റെ ഒരു ശതമാനത്തിൽ കൂടുതൽ ഇതിനായി ചെലവഴിക്കാതിരിക്കുക തുടങ്ങിയ മുൻകരുതലുകൾ പാലിക്കണമെന്നും വിദഗ്ധർ നിർദ്ദേശിച്ചു.

നിയന്ത്രണങ്ങളിലൂടെ അനധികൃത ചൂതാട്ടം കുറയ്ക്കാൻ കഴിയുമെന്ന് ഒരു വിഭാഗം വാദിക്കുമ്പോൾ, എളുപ്പത്തിലുള്ള ലഭ്യത പുതിയ സാമൂഹിക പ്രശ്നങ്ങൾക്ക് കാരണമാകുമോ എന്ന ആശങ്കയും ശക്തമാണ്.