കനേഡിയൻ സർക്കാർ പ്രഖ്യാപിച്ച പ്രത്യേക ഗ്രോസറി ആനുകൂല്യം ജൂൺ 5-ന് ലഭിക്കും

കാനഡയിലെ സാധാരണക്കാർക്ക് ആശ്വാസമായി സർക്കാർ പ്രഖ്യാപിച്ച പ്രത്യേക സാമ്പത്തിക സഹായം ജൂൺ അഞ്ചിന് കൈകളിലെത്തും. ഭക്ഷണസാധനങ്ങൾ വാങ്ങാനും മറ്റ് അത്യാവശ്യങ്ങൾക്കുമായി നൽകുന്ന ഈ തുക 'കാനഡ ഗ്രോസറി ആൻഡ് എസൻഷ്യൽസ് ബെനഫിറ്റ്' എന്ന പുതിയ പദ്ധതിയുടെ ഭാഗമാണ്. കുറഞ്ഞ വരുമാനമുള്ള ഏകദേശം ഒരു കോടിയിലധികം (12 മില്യൺ) ആളുകൾക്ക് ഇതിൻ്റെ പ്രയോജനം ലഭിക്കുമെന്ന് അധികൃതർ അറിയിച്ചു.

ഈ വർഷം ജനുവരിയിലാണ് പ്രധാനമന്ത്രി മാർക്ക് കാർണി ഈ പുതിയ പദ്ധതി പ്രഖ്യാപിച്ചത്. പഴയ ജിഎസ്ടി ക്രെഡിറ്റ് തുകയിൽ 25 ശതമാനം വർദ്ധനവ് വരുത്താനാണ് സർക്കാർ തീരുമാനം. ഇതിൻ്റെ ഭാഗമായി ഒരു വർഷം ലഭിക്കുന്ന ആനുകൂല്യത്തിൻ്റെ പകുതിയോളം തുകയാണ് ജൂൺ മാസത്തിൽ ഒറ്റത്തവണയായി നൽകുന്നത്.

ഉദാഹരണത്തിന്, മുൻപ് ഒരു വർഷം 1,100 ഡോളർ ലഭിച്ചിരുന്ന നാലംഗ കുടുംബത്തിന് ഇത്തവണ 1,890 ഡോളർ വരെ ലഭിച്ചേക്കാം. സാധനങ്ങളുടെ വിലക്കയറ്റം മൂലം ബുദ്ധിമുട്ടുന്നവർക്ക് വലിയൊരു സഹായമാകും ഈ തുക. വരും വർഷങ്ങളിലും ഈ ആനുകൂല്യം തുടരാനാണ് സർക്കാർ തീരുമാനം.