കാനഡയിലെ 7-ഇലവൻ സ്റ്റോറുകളിൽ നിന്ന് ഭക്ഷണസാധനങ്ങൾ തിരിച്ചു വിളിക്കുന്നു, നടപടി ബാക്ടീരിയയുടെ സാന്നിധ്യം കണ്ടെത്തിയതിന് തുടർന്ന്

 

കാനഡയിലെ പ്രശസ്ത വ്യാപാര ശൃംഖലയായ 7-ഇലവൻ വിൽക്കുന്ന സാൻഡ്‌വിച്ചുകളും റാപ്പുകളും ഉൾപ്പെടെയുള്ള 13 തരം ഭക്ഷണസാധനങ്ങൾ വിപണിയിൽ നിന്ന് തിരിച്ചുവിളിക്കുന്നു. ലിസ്റ്റീരിയ എന്ന ബാക്ടീരിയയുടെ സാന്നിധ്യം കണ്ടെത്തിയതിനെത്തുടർന്നാണ് നടപടി.

ആൽബർട്ട, ബ്രിട്ടീഷ് കൊളംബിയ, സസ്‌കാച്ചവൻ എന്നീ പ്രവിശ്യകളിൽ വിറ്റഴിച്ച ഭക്ഷണസാധനങ്ങൾക്കാണ് നിയന്ത്രണം ഏർപ്പെടുത്തിയത്. ചിക്കൻ റാപ്പുകൾ, ട്യൂണ സാൻഡ്‌വിച്ച്, പിസ്സ സബ് തുടങ്ങിയവ ഇതിൽ ഉൾപ്പെടുന്നു. ഈ ബാക്ടീരിയ ബാധിക്കുന്നത് പനി, പേശി വേദന, ഛർദ്ദി തുടങ്ങിയ ആരോഗ്യ പ്രശ്നങ്ങൾക്ക് കാരണമാകും. പ്രത്യേകിച്ച് ഗർഭിണികൾക്കും മുതിർന്നവർക്കും ഇത് വലിയ അപകടമുണ്ടാക്കാം.

നിലവിൽ ആർക്കും രോഗബാധ റിപ്പോർട്ട് ചെയ്തിട്ടില്ല. എങ്കിലും, ഈ സാധനങ്ങൾ വാങ്ങിയവർ അവ ഉപയോഗിക്കരുതെന്നും സ്റ്റോറുകളിൽ തിരികെ നൽകണമെന്നും കനേഡിയൻ ഫുഡ് ഇൻസ്‌പെക്ഷൻ ഏജൻസി അറിയിച്ചു. കടകളിൽ നിന്ന് ഇവ പൂർണ്ണമായും നീക്കം ചെയ്യാനുള്ള നടപടികൾ നടന്നുവരികയാണ്. പൂട്ടലിൻ്റെ വക്കിലുള്ള 7-ഇലവൻ കമ്പനിക്ക് ഈ പുതിയ പ്രതിസന്ധി വലിയ തിരിച്ചടിയായിട്ടുണ്ട്.