നയപ്രഖ്യാപനങ്ങൾക്ക് പിന്നാലെ എണ്ണ വിപണിയിൽ ക്രമക്കേട്: യുഎസ് അന്വേഷണം ഊർജിതമാക്കി

 

ഇറാൻ യുദ്ധവുമായി ബന്ധപ്പെട്ട യുഎസ് നയങ്ങളിൽ മാറ്റം വരുന്നതിന് തൊട്ടുപിന്നാലെ എണ്ണ വിപണിയിൽ നടന്ന വൻതോതിലുള്ള ഇടപാടുകളെക്കുറിച്ച് യുഎസ് ഫെഡറൽ റെഗുലേറ്റർമാർ അന്വേഷണം ആരംഭിച്ചു. ഡോണാൾഡ് ട്രംപിൻ്റെ നിർണ്ണായകമായ നയപ്രഖ്യാപനങ്ങൾക്ക് തൊട്ടു മുൻപ്  'ഓയിൽ ഫ്യൂച്ചേഴ്സിൽ' നടന്ന സംശയാസ്പദമായ വ്യാപാരങ്ങളാണ് കമ്മോഡിറ്റി ഫ്യൂച്ചേഴ്സ് ട്രേഡിംഗ് കമ്മീഷൻ്റെ (CFTC) നിരീക്ഷണത്തിലുള്ളത്.

മാർച്ച് 23, ഏപ്രിൽ ഏഴ് തീയതികളിൽ സിഎംഇ ഗ്രൂപ്പ്, ഇൻ്റർകോണ്ടിനെൻ്റൽ എക്സ്ചേഞ്ച് എന്നിവ വഴി നടന്ന ഇടപാടുകൾ കേന്ദ്രീകരിച്ചാണ് നിലവിൽ പരിശോധന നടക്കുന്നത്. ഈ വ്യാപാരങ്ങൾക്ക് പിന്നിൽ പ്രവർത്തിച്ചവരുടെ വിവരങ്ങൾ കൈമാറാൻ എക്സ്ചേഞ്ചുകളോട് അന്വേഷണ ഏജൻസി ആവശ്യപ്പെട്ടതായാണ് റിപ്പോർട്ടുകൾ. സർക്കാർ തലത്തിലുള്ള അതീവ രഹസ്യ വിവരങ്ങൾ ചോർന്നതിലൂടെ നിക്ഷേപകർ ദശലക്ഷക്കണക്കിന് ഡോളർ ലാഭം കൊയ്തതായാണ് പ്രാഥമിക നിഗമനം. കഴിഞ്ഞ ആഴ്ച യുഎസ് - ഇറാൻ വെടിനിർത്തൽ പ്രഖ്യാപനത്തിന് മണിക്കൂറുകൾക്ക് മുൻപ് നടന്ന 950 മില്യൺ ഡോളറിൻ്റെ നിക്ഷേപം വിപണിയിൽ വലിയ ചർച്ചയായിരുന്നു. ഇത്തരം മുൻകൂട്ടിയുള്ള ഇടപാടുകൾ വിപണിയിലെ സുതാര്യതയെ ബാധിക്കുമെന്ന് നിയമനിർമ്മാതാക്കളും വിദഗ്ധരും മുന്നറിയിപ്പ് നൽകിയിട്ടുണ്ട്.

ഊർജ്ജ വിപണിയിലെ കൃത്രിമത്വവും 'ഇൻസൈഡർ ട്രേഡിംഗും' തടയുന്നതിന് കർശനമായ നടപടികൾ സ്വീകരിക്കുമെന്ന് സിഎഫ്ടിസി എൻഫോഴ്സ്‌മെൻ്റ് വിഭാഗം വ്യക്തമാക്കി. ഇതിനിടെ, ഉദ്യോഗസ്ഥർ തങ്ങളുടെ പദവികൾ ദുരുപയോഗം ചെയ്ത് വിപണിയിൽ ഇടപെടരുതെന്ന് വൈറ്റ് ഹൗസ് കർശന നിർദ്ദേശം നൽകിയിട്ടുണ്ട്.