വാസക്ടമി പരാജയപ്പെട്ടു; ബ്രിട്ടീഷ് ദമ്പതികള്ക്ക് 14-ാമത് കുഞ്ഞ് വരുന്നു!
By: 600002 On: Apr 16, 2026, 10:06 AM
പി പി ചെറിയാന്
യുകെ: വാസക്ടമി (പുരുഷ വന്ധ്യംകരണം) നടത്തിയിട്ടും ഫലം കാണാതെ 14-ാമത് കുഞ്ഞിനെ വരവേല്ക്കാന് ഒരുങ്ങുകയാണ് യുകെയിലെ ഒലിവര്-നതാലി ജാക്സണ് ദമ്പതികള്. 10 കുട്ടികള് ആയപ്പോള് മതിയാക്കാം എന്ന് കരുതിയാണ് ഒലിവര് വാസക്ടമി ചെയ്തത്. എന്നാല് ശസ്ത്രക്രിയക്ക് ശേഷം ജനിക്കാന് പോകുന്ന നാലാമത്തെ കുഞ്ഞാണിത്.
യുകെയില് നിന്നുള്ള ജാക്സണ് കുടുംബം ഏപ്രില് 14 ചൊവ്വാഴ്ച ബ്രിട്ടീഷ് ടോക്ക് ഷോയായ 'ദിസ് മോര്ണിംഗില്' അതിഥികളായെത്തി. ഒലിവര് എന്ന വ്യക്തി താന് മുന്പ് ഒരു വാസക്ടമി ശസ്ത്രക്രിയക്ക് വിധേയനായിരുന്നുവെന്നും, എന്നാല് അത് പരാജയപ്പെട്ടുവെന്നും പരിപാടിക്കിടെ വെളിപ്പെടുത്തി.
2004-ല് ഒലിവറിന് മൂന്നാം ഘട്ട വൃഷണ അര്ബുദം ബാധിച്ചിരുന്നു. തുടര്ന്ന് നടന്ന ശസ്ത്രക്രിയക്കും കീമോതെറാപ്പിക്കും ശേഷം കുട്ടികളുണ്ടാകാന് സാധ്യത കുറവാണെന്നായിരുന്നു ഡോക്ടര്മാര് പറഞ്ഞിരുന്നത്. എന്നാല് അതെല്ലാം മറികടന്നാണ് ഈ വലിയ കുടുംബം വളര്ന്നത്.
ഇത്രയും വലിയ കുടുംബത്തെ ഒരു ഭാരമായി കാണുന്നില്ലെന്നും തങ്ങള് ഭാഗ്യവാന്മാരാണെന്നും നതാലി പറഞ്ഞു. ഭര്ത്താവിന് നല്ല ശമ്പളമുള്ള ജോലിയുണ്ടെന്നും ബജറ്റ് അനുസരിച്ച് കാര്യങ്ങള് മുന്നോട്ട് കൊണ്ടുപോകുമെന്നും അവര് കൂട്ടിച്ചേര്ത്തു. എന്തായാലും ഒരിക്കല് കൂടി വാസക്ടമി ചെയ്യാനുള്ള തയ്യാറെടുപ്പിലാണ് ഒലിവര്.