കാനഡയിൽ ഏറ്റവും ഉയർന്ന തൊഴിലില്ലായ്മ ലണ്ടനിൽ; 2026-ൽ സാമ്പത്തിക മാന്ദ്യം തുടരുമെന്ന് മുന്നറിയിപ്പ്

കനേഡിയൻ നഗരങ്ങളിൽ ഏറ്റവും ഉയർന്ന തൊഴിലില്ലായ്മ നിരക്ക് ഒൻ്റാരിയോയിലെ ലണ്ടനിൽ രേഖപ്പെടുത്തി. മാർച്ചിലെ കണക്കനുസരിച്ച് 9.1 ശതമാനമാണ് നഗരത്തിലെ തൊഴിലില്ലായ്മ നിരക്ക്. മാർച്ചിൽ മാത്രം ഏകദേശം 3,000 തൊഴിലവസരങ്ങൾ നഷ്ടപ്പെട്ടതായാണ് റിപ്പോർട്ടുകൾ സൂചിപ്പിക്കുന്നത്. സിഗ്നൽ 49  പുറത്തുവിട്ട പുതിയ സാമ്പത്തിക പ്രവചനമനുസരിച്ച്, 2026 വരെ ലണ്ടനിലെ സാമ്പത്തിക വളർച്ച മന്ദഗതിയിലായിരിക്കും.

അമേരിക്കൻ താരിഫുകളെത്തുടർന്ന് ഉൽപ്പാദന മേഖലയിലുണ്ടായ തളർച്ചയും വിദേശ വിദ്യാർത്ഥികളുടെ എണ്ണത്തിൽ വന്ന കുറവുമാണ് ഈ പ്രതിസന്ധിക്ക് പ്രധാന കാരണങ്ങളായി ചൂണ്ടിക്കാണിക്കപ്പെടുന്നത്. നിലവിലെ പ്രതിസന്ധി താൽക്കാലികമാണെന്നും 2027 മുതൽ നഗരത്തിൻ്റെ സമ്പദ്‌വ്യവസ്ഥ ശക്തമായി തിരിച്ചുവരുമെന്നും സാമ്പത്തിക വിദഗ്ധർ പ്രവചിക്കുന്നു. സെൻ്റ് തോമസിലെ ഫോക്സ്‌വാഗൺ ഇലക്ട്രിക് വാഹന ബാറ്ററി പ്ലാൻ്റ് (PowerCo) പൂർണ്ണതോതിൽ പ്രവർത്തനം ആരംഭിക്കുന്നതോടെ നിർമ്മാണ മേഖലയിലും അനുബന്ധ ഗതാഗത-വ്യാപാര മേഖലകളിലും ആയിരക്കണക്കിന് പുതിയ തൊഴിലവസരങ്ങൾ സൃഷ്ടിക്കപ്പെടും.

2027-നും 2030-നും ഇടയിൽ 2.4 ശതമാനം സാമ്പത്തിക വളർച്ചയാണ് പ്രതീക്ഷിക്കുന്നത്. കൂടാതെ, ആരോഗ്യ സംരക്ഷണ മേഖലയിലെ ആവശ്യകത വർദ്ധിക്കുന്നതും ഭവന നിർമ്മാണ രംഗത്തെ ഉണർവും വരും വർഷങ്ങളിൽ ലണ്ടനിലെ തൊഴിൽ വിപണിക്ക് കരുത്തേകുമെന്നും റിപ്പോർട്ട് വ്യക്തമാക്കുന്നു.