കാനഡയിൽ വൈദഗ്ധ്യ തൊഴിലുകളോടുള്ള വിമുഖത മാറണം; യുവാക്കളോട് തൊഴിൽ മന്ത്രിയുടെ ആഹ്വാനം

 

 

കാനഡയുടെ അടിസ്ഥാന സൗകര്യ വികസനത്തിനും ഭവന നിർമ്മാണ ലക്ഷ്യങ്ങൾക്കും ഊർജ്ജം പകരാൻ യുവാക്കൾ  സാങ്കേതിക വൈദഗ്ധ്യം ആവശ്യമായ തൊഴിലുകൾ പ്രധാന കരിയറായി തിരഞ്ഞെടുക്കണമെന്ന് ഫെഡറൽ തൊഴിൽ മന്ത്രി പാറ്റി ഹജ്‌ദു. സർവ്വകലാശാലാ ബിരുദങ്ങൾ മാത്രമാണ് സാമൂഹിക പദവിയിലേക്കുള്ള ഏക മാർഗ്ഗമെന്ന നിലവിലുള്ള തെറ്റായ ധാരണകൾ തിരുത്തപ്പെടേണ്ടതുണ്ടെന്ന് അവർ വാർത്താസമ്മേളനത്തിൽ പറഞ്ഞു.

പലപ്പോഴും ബിരുദധാരികളേക്കാൾ ഉയർന്ന വരുമാനവും മികച്ച തൊഴിൽ സാഹചര്യങ്ങളും ഉറപ്പാക്കാൻ നൈപുണ്യ തൊഴിലുകളിലൂടെ സാധിക്കുമെന്നും, ഈ മേഖലയോടുള്ള സാമൂഹിക വിവേചനം രാജ്യത്തിൻ്റെ വളർച്ചയെ ബാധിക്കുമെന്നും മന്ത്രി മുന്നറിയിപ്പ് നൽകി. രാജ്യത്തെ യുവജനതയ്ക്കിടയിൽ തൊഴിലില്ലായ്മ നിരക്ക് 13.8 ശതമാനമായി നിൽക്കുന്ന പശ്ചാത്തലത്തിൽ, നൈപുണ്യ തൊഴിലുകൾക്ക് വിപണിയിൽ വലിയ സാധ്യതകളാണുള്ളതെന്ന് തൊഴിൽ വിപണിയിലെ വിദഗ്ധർ ചൂണ്ടിക്കാട്ടുന്നു.

ആർട്ടിഫിഷ്യൽ ഇൻ്റലിജൻസിൻ്റെ  കടന്നുകയറ്റം വൈജ്ഞാനിക മേഖലകളിലെ തൊഴിലുകളെ ബാധിക്കുമ്പോൾ, നിർമ്മാണ-ആരോഗ്യ മേഖലകളിലെ പ്രായോഗിക തൊഴിലുകൾക്ക് സുരക്ഷിതത്വം വർദ്ധിക്കുകയാണ്. യുവാക്കളെ ഈ രംഗത്തേക്ക് ആകർഷിക്കുന്നതിനായി പ്രത്യേക ഇൻസെൻ്റീവുകളും പരിശീലന പദ്ധതികളും ഫെഡറൽ സർക്കാർ ആവിഷ്കരിക്കുന്നുണ്ട്. ഇതിൻ്റെ ഭാഗമായി ഒരു ലക്ഷം തൊഴിലവസരങ്ങൾ ഉൾപ്പെടുന്ന 'കാനഡ സമ്മർ ജോബ്സ്'  പദ്ധതിയിലേക്കുള്ള അപേക്ഷകൾ അടുത്ത ആഴ്ച മുതൽ സ്വീകരിച്ചു തുടങ്ങുമെന്നും അധികൃതർ അറിയിച്ചു.