ഉപതിരഞ്ഞെടുപ്പുകളിൽ വൻ വിജയം; കാനഡയിൽ മാർക്ക് കാർണി സർക്കാർ കേവല ഭൂരിപക്ഷത്തിലേക്ക്

ഒൻ്റാരി യോ, ക്യൂബെക് പ്രവിശ്യകളിൽ നടന്ന നിർണ്ണായകമായ മൂന്ന് ഫെഡറൽ ഉപതിരഞ്ഞെടുപ്പുകളിലും വിജയിച്ചതോടെ പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള ലിബറൽ പാർട്ടി കാനഡയിൽ കേവല ഭൂരിപക്ഷം ഉറപ്പാക്കി. യൂണിവേഴ്‌സിറ്റി-റോസ്‌ഡെയ്‌ലിൽ ഡാനിയേൽ മാർട്ടിൻ 64 ശതമാനം വോട്ടുകൾ നേടിയാണ് വിജയിച്ചത്. സ്കാർബറോ സൗത്ത്‌വെസ്റ്റിൽ എൻഡിപിയുടെ മുൻ ഡെപ്യൂട്ടി ലീഡർ ഡോളി ബീഗം 70 ശതമാനം വോട്ടുകളോടെ ഉജ്ജ്വല വിജയം നേടി.

ക്യൂബെക്കിലെ ടെറെബോണിൽ നടന്ന കടുത്ത പോരാട്ടത്തിനൊടുവിൽ ലിബറൽ സ്ഥാനാർത്ഥി ടാറ്റിയാന അഗസ്റ്റെ, ബ്ലോക്ക് ക്യൂബെക്കോയിസിൻ്റെ നതാലി സിൻക്ലെയർ-ഡെസ്ഗാഗ്നെയെ 731 വോട്ടുകൾക്ക് പരാജയപ്പെടുത്തി. ഈ വിജയങ്ങളോടെ ലിബറൽ പാർട്ടിയുടെ ആകെ സീറ്റുകൾ 174 ആയി ഉയർന്നു. കഴിഞ്ഞ നവംബറിനും ഏപ്രിലിനുമിടയിൽ നാല് കൺസർവേറ്റീവ് അംഗങ്ങളും ഒരു എൻഡിപി അംഗവും ലിബറൽ പാർട്ടിയിലേക്ക് മാറിയത് കാർണി സർക്കാരിന് നേരത്തെ തന്നെ മുൻതൂക്കം നൽകിയിരുന്നു.

ഭവനനിർമ്മാണം, ജീവിതച്ചെലവ് കുറയ്ക്കൽ, ആരോഗ്യ സംരക്ഷണം, കാലാവസ്ഥാ വ്യതിയാനം തുടങ്ങിയ സുപ്രധാന വിഷയങ്ങളിൽ അടിയന്തരമായി പ്രവർത്തിക്കാനുള്ള വ്യക്തമായ ജനവിധിയാണ് ഇതെന്ന്  വിജയത്തിന് ശേഷം ഡാനിയേൽ മാർട്ടിൻ പ്രതികരിച്ചു. ക്രിസ്റ്റിയ ഫ്രീലാൻഡ്, ബിൽ ബ്ലെയർ എന്നിവരുടെ രാജിയെത്തുടർന്ന് ഒഴിവുവന്ന സീറ്റുകളിലെ ഈ വിജയം മാർക്ക് കാർണിയുടെ നേതൃത്വത്തിന് ലഭിച്ച വലിയ അംഗീകാരമായാണ് രാഷ്ട്രീയ നിരീക്ഷകർ വിലയിരുത്തുന്നത്. വരും ദിവസങ്ങളിൽ കൂടുതൽ ശക്തമായ സാമ്പത്തിക-സാമൂഹിക പരിഷ്കാരങ്ങളുമായി മുന്നോട്ട് പോകാനാണ് ഭരണകക്ഷിയുടെ തീരുമാനം.