ടോ ട്രക്ക് മാഫിയാ യുദ്ധം: സ്റ്റോണി ക്രീക്കിൽ വെടിയേറ്റ് ഒരാൾ മരിച്ചു

 

ഗ്രേറ്റർ ടൊറൻ്റോ ഏരിയയിലെ ടോ ട്രക്ക് കമ്പനികൾ തമ്മിലുള്ള തർക്കം വീണ്ടും രക്തച്ചൊരിച്ചിലിൽ കലാശിച്ചു. ഒൻ്റാരിയിലെ സ്റ്റോണി ക്രീക്കിലുണ്ടായ വെടിവെപ്പിൽ ഒരാൾ കൊല്ലപ്പെട്ടു. ഈ മേഖലയിലെ ടോ ട്രക്ക് കരാറുകളെച്ചൊല്ലി നിലനിൽക്കുന്ന കുടിപ്പകയാണ് കൊലപാതകത്തിന് പിന്നിലെന്നാണ് പൊലീസ് സംശയിക്കുന്നത്. 16 വയസ്സുകാരനായ ഫൈസാൻ അവാനാണ് മരിച്ചത്.

സ്റ്റോണി ക്രീക്കിലെ ജനവാസ മേഖലയിൽ രാത്രി വൈകിയാണ് വെടിയൊച്ച കേട്ടത്. ഒരാൾ സംഭവസ്ഥലത്ത് വെച്ച് തന്നെ മരിച്ചു. സംഘടിത കുറ്റവാളി ഗ്രൂപ്പുകൾ തമ്മിലുള്ള തർക്കമാണ് ഇതിന് പിന്നിലെന്നാണ് പോലീസ് കരുതുന്നത്. കേസിൽ പ്രതികളായ അഞ്ച് പേരിൽ രണ്ടുപേർ അഭയാർത്ഥി അപേക്ഷകരാണ്. മൊഹമ്മദ് അബുറാസ്, റാമി കാസെം എന്നിവരാണ് ഇവർ.  ടോ ട്രക്ക് മേഖലയിലെ ആധിപത്യത്തിനായി മുൻപും സമാനമായ ആക്രമണങ്ങൾ നടന്നിട്ടുണ്ട്. ഈ സംഘർഷങ്ങളിൽ അഭയാർത്ഥികളായി എത്തിയവർക്കും പങ്കുണ്ടെന്ന് സൂചനകളുണ്ട്. എളുപ്പത്തിൽ പണമുണ്ടാക്കാം എന്ന വാഗ്ദാനം നൽകിയാണ് ഇവരെ ഇത്തരം സംഘങ്ങളിലേക്ക് ആകർഷിക്കുന്നതെന്ന് റിപ്പോർട്ടുകൾ പറയുന്നു.

കഴിഞ്ഞ കുറച്ച് വർഷങ്ങളായി ടൊറൻ്റോയിൽ ടോ ട്രക്ക് കമ്പനികൾ തമ്മിൽ തർക്കം നിലനിൽക്കുന്നുണ്ട്. ഇത് മുൻപ് തീവെപ്പിനും മറ്റ് അക്രമാസക്തമായ ഏറ്റുമുട്ടലുകൾക്കും കാരണമായിട്ടുണ്ട്. ടോ ട്രക്ക് ബിസിനസ്സ് നിയന്ത്രിക്കാൻ ഒൻ്റാരിയോ സർക്കാർ ശ്രമിക്കുന്നുണ്ടെങ്കിലും നിയമങ്ങൾ കർശനമായി നടപ്പിലാക്കുന്നില്ലെന്ന് ആക്ഷേപമുണ്ട്. വെടിവെപ്പിനെക്കുറിച്ച് വിവരങ്ങൾ ലഭിക്കുന്നവർ പോലീസിനെ അറിയിക്കണമെന്ന് അധികൃതർ അഭ്യർത്ഥിച്ചു. പ്രാദേശിക ബിസിനസ് തർക്കങ്ങൾ ക്രിമിനൽ സംഘങ്ങൾ ഏറ്റെടുക്കുന്നത് എങ്ങനെയാണ് സാധാരണക്കാരുടെ സുരക്ഷയ്ക്ക് ഭീഷണിയാകുന്നത് എന്നതിൻ്റെ ഏറ്റവും പുതിയ തെളിവാവുകയാണ് ഈ സംഭവം.