ആർട്ടെമിസ് II-ന് പിന്നാലെ ചാന്ദ്ര പദ്ധതികളിൽ സജീവമാകാൻ കാനഡ; പുതിയ ലൂണാർ റോവർ അണിയറയിൽ

 നാസയുടെ ആർട്ടെമിസ് II ദൗത്യം വിജയകരമായി പൂർത്തിയാക്കി കനേഡിയൻ പ്രാതിനിധ്യം ആഗോളതലത്തിൽ ശ്രദ്ധിക്കപ്പെട്ടതിന് പിന്നാലെ, ബഹിരാകാശ പര്യവേക്ഷണ രംഗത്ത് തങ്ങളുടെ സ്വാധീനം വർദ്ധിപ്പിക്കാനൊരുങ്ങി കാനഡ. ചന്ദ്രനിലേക്കുള്ള ഭാവി ദൗത്യങ്ങളിൽ രാജ്യം വഹിക്കേണ്ട പങ്കിനെക്കുറിച്ച് കനേഡിയൻ സ്പേസ് ഏജൻസിയിലെ മുതിർന്ന ശാസ്ത്രജ്ഞർ ഗൗരവമായ ചർച്ചകൾ ആരംഭിച്ചു കഴിഞ്ഞു.

നിലവിലെ ആവേശം പ്രായോഗികമായ നേട്ടങ്ങളാക്കി മാറ്റാൻ ബഹിരാകാശ പദ്ധതികൾ കൂടുതൽ വേഗത്തിൽ നടപ്പിലാക്കണമെന്ന് വെസ്റ്റേൺ യൂണിവേഴ്സിറ്റിയിലെ ഭൗമശാസ്ത്രജ്ഞനായ ഡോ. ഗോർഡൻ ഓസിൻസ്‌കി അഭിപ്രായപ്പെട്ടു. ഇതിൻ്റെ ഭാഗമായി, 2034-ഓടെ ചന്ദ്രോപരിതലത്തിൽ എത്തിക്കാൻ ലക്ഷ്യമിടുന്ന അത്യാധുനിക 'യൂട്ടിലിറ്റി റോവറിൻ്റെ' പ്രാഥമിക രൂപരേഖാ പഠനങ്ങൾ കാനഡ ആരംഭിച്ചിട്ടുണ്ട്. ആർട്ടെമിസ് ദൗത്യങ്ങളുടെ ശാസ്ത്രീയ സമിതിയിൽ കാനഡയിൽ നിന്നുള്ള ഏക പ്രതിനിധിയായ ഡോ. ഓസിൻസ്‌കി, വരാനിരിക്കുന്ന ആർട്ടെമിസ് IV ദൗത്യത്തിൻ്റെ സുപ്രധാന ഭാഗമാണ്. ചന്ദ്രോപരിതലത്തിലെ ലാൻഡിംഗ് സൈറ്റുകൾ തിരഞ്ഞെടുക്കുന്നതിലും, സഞ്ചാരികൾക്ക് ആവശ്യമായ ഭൗമശാസ്ത്രപരമായ  പരിശീലനം നൽകുന്നതിലും അദ്ദേഹം വലിയ പങ്കാണ് വഹിക്കുന്നത്.

വടക്കൻ ലാബ്രഡോറിലെയും അരിസോണയിലെയും സവിശേഷമായ ഭൂപ്രകൃതികളിൽ വെച്ച് നൽകുന്ന പരിശീലനം, ബഹിരാകാശ സഞ്ചാരികൾക്ക് ചന്ദ്രനിലെ നിരീക്ഷണങ്ങൾ കൂടുതൽ കൃത്യമായി നടത്താൻ സഹായകമാകുന്നുണ്ട്. കാനഡയുടെ സാങ്കേതിക മികവും  വൈദഗ്ധ്യവും ആഗോള ബഹിരാകാശ പര്യവേക്ഷണ രംഗത്ത് രാജ്യത്തിന് പുതിയ അവസരങ്ങൾ തുറന്നു നൽകുമെന്നാണ് പ്രതീക്ഷിക്കുന്നത്.