ബാൻഫ് നാഷണൽ പാർക്കിൽ മദ്യത്തിനും കഞ്ചാവിനും ചില ദിവസങ്ങളിൽ നിരോധനം: നിയമം ലംഘിച്ചാൽ വൻ തുക പിഴ

 

ബാൻഫ് നാഷണൽ പാർക്കിലെ ക്യാമ്പ് ഗ്രൗണ്ടുകളിൽ സന്ദർശകർക്കായി പാർക്സ് കാനഡ പുതിയ നിയന്ത്രണങ്ങൾ ഏർപ്പെടുത്തി. 2026-ലെ മൂന്ന് പ്രധാന വാരാന്ത്യങ്ങളിൽ മദ്യവും കഞ്ചാവും ഉപയോഗിക്കുന്നത് പൂർണ്ണമായും നിരോധിച്ചു. ക്യാമ്പ് ഗ്രൗണ്ടുകൾ കുടുംബസൗഹൃദമാക്കുന്നതിനും സുരക്ഷ ഉറപ്പാക്കുന്നതിനുമാണ് ഈ കടുത്ത നടപടി.

വിക്ടോറിയ ഡേ (മെയ് 15-18), ഹെറിറ്റേജ് ഡേ (ജൂലൈ 31-ഓഗസ്റ്റ് 3), ലേബർ ഡേ (സെപ്റ്റംബർ 4-7) എന്നീ ദിവസങ്ങളിലാണ് നിരോധനം ഏർപ്പെടുത്തിയിട്ടുള്ളത്. വാരാന്ത്യത്തിൻ്റെ ആദ്യ ദിവസം രാവിലെ ഏഴ് മണിക്ക് തുടങ്ങി അവസാന ദിവസം രാവിലെ 11 മണിക്ക് അവസാനിക്കും. ലേക്ക് ലൂയിസ്, കാസിൽ മൗണ്ടൻ, ജോൺസ്റ്റൺ കാന്യോൺ തുടങ്ങി പാർക്കിലെ മിക്കവാറും എല്ലാ പ്രധാന ക്യാമ്പ് ഗ്രൗണ്ടുകളിലും നിയന്ത്രണമുണ്ടാകും.

നിയമം ലംഘിക്കുന്നവർക്ക് കാനഡ നാഷണൽ പാർക്സ് ആക്ട് പ്രകാരം കടുത്ത ശിക്ഷ ലഭിക്കും. 25,000 ഡോളർ വരെ പിഴ ചുമത്താനും ക്യാമ്പിൽ നിന്ന് ഉടൻ പുറത്താക്കാനും നിയമമുണ്ട്. കൂടാതെ, ക്യാമ്പിംഗ് പെർമിറ്റ് റദ്ദാക്കുമെന്നും അടച്ച ഫീസ് തിരികെ ലഭിക്കില്ലെന്നും അധികൃതർ മുന്നറിയിപ്പ് നൽകി.