വാൻകൂവറിൽ നികുതി വർദ്ധനവ് നടപ്പാക്കില്ല: വികസന പദ്ധതികളുമായി മേയർ കെൻ സിം

നഗരസഭാ തെരഞ്ഞെടുപ്പ് അടുത്തിരിക്കെ, വരാനിരിക്കുന്ന സാമ്പത്തിക വർഷത്തിലും വസ്തു നികുതി വർദ്ധിപ്പിക്കില്ലെന്ന നിർണ്ണായക പ്രഖ്യാപനവുമായി വാൻകൂവർ മേയർ കെൻ സിം. ബുധനാഴ്ച നടന്ന 'സ്റ്റേറ്റ് ഓഫ് ദി സിറ്റി' അഭിസംബോധനയിലാണ്, ഭൂരിപക്ഷ കൗൺസിൽ 'സീറോ പെർസെൻ്റ്' നികുതി നയം തുടരുമെന്ന്  വ്യക്തമാക്കിയത്. മുൻ ഭരണകൂടങ്ങളുടെ തെറ്റായ നയങ്ങളും നിക്ഷേപക്കുറവും നഗരത്തെ പ്രതിസന്ധിയിലാക്കിയെന്നും, ഈ സംവിധാനത്തെ പുനരുദ്ധരിക്കാൻ താൻ പ്രതീക്ഷിച്ചതിലും കൂടുതൽ സമയം ആവശ്യമാണെന്നും അദ്ദേഹം സമ്മതിച്ചു.

സാമ്പത്തിക അച്ചടക്കത്തിലൂടെയും സുരക്ഷിതമായ കമ്മ്യൂണിറ്റികൾ കെട്ടിപ്പടുക്കുന്നതിലൂടെയും മാത്രമേ ശക്തമായൊരു സമ്പദ്‌വ്യവസ്ഥ നിലനിർത്താൻ കഴിയൂ എന്ന് അദ്ദേഹം കൂട്ടിച്ചേർത്തു. നഗരത്തിലെ തകർച്ചയിലായ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനായി വൻതോതിലുള്ള നിക്ഷേപ പദ്ധതികളും മേയർ പ്രഖ്യാപിച്ചു. അടുത്ത പത്ത് വർഷത്തിനുള്ളിൽ അഞ്ച് പ്രധാന കമ്മ്യൂണിറ്റി സെൻ്ററുകളുടെ പുനർനിർമ്മാണത്തിനും നവീകരണത്തിനുമായി 400 മില്യൺ ഡോളർ ചിലവിടുമെന്ന് അദ്ദേഹം ഉറപ്പുനൽകി. നഗരത്തിലെ വിനോദസഞ്ചാര-വിശ്രമ കേന്ദ്രങ്ങളിൽ 72 ശതമാനവും മോശം അവസ്ഥയിലാണെന്ന റിപ്പോർട്ടുകൾ പുറത്തുവന്ന പശ്ചാത്തലത്തിലാണ് ഈ നീക്കം. എന്നാൽ, നികുതി മരവിപ്പിക്കുന്നത് പൊതുസേവനങ്ങളെയും തൊഴിലവസരങ്ങളെയും ദോഷകരമായി ബാധിക്കുമെന്ന് പ്രതിപക്ഷം ആരോപിക്കുന്നുണ്ട്. ഒക്ടോബറിലാണ്  തെരഞ്ഞെടുപ്പ് നടക്കുക