പുതിയ വീടുകളുടെ ജിഎസ്ടി ഒഴിവാക്കാൻ കാനഡ: പ്രവിശ്യകളുമായി ചർച്ചകൾ തുടരുന്നു

 

പുതിയ വീടുകൾക്ക് ചരക്ക് സേവന നികുതി ഒഴിവാക്കുന്നതുമായി ബന്ധപ്പെട്ട് കനേഡിയൻ സർക്കാർ എല്ലാ പ്രവിശ്യകളുമായും ചർച്ചകൾ ആരംഭിച്ചു. ഒൻ്റാരിയോയിൽ പുതിയ വീടുകൾക്ക് ഒരു വർഷത്തേക്ക് എച്ച്എസ് ടി ഒഴിവാക്കാൻ തീരുമാനിച്ചതിന് പിന്നാലെയാണ് ഈ നീക്കം. വിപണിയിൽ പുതിയ ഉണർവ് നൽകാനും ഭവന നിർമ്മാണ മേഖല നേരിടുന്ന പ്രതിസന്ധികൾ മറികടക്കാനുമാണ് ഈ പദ്ധതിയെന്ന് കേന്ദ്ര ഭവന നിർമ്മാണ മന്ത്രി ഗ്രെഗർ റോബർട്ട്‌സൺ വ്യക്തമാക്കി. മറ്റ് പ്രവിശ്യകളുമായി കരാറിലെത്തുന്നതിന് മുൻപ് അതത് പ്രവിശ്യ സർക്കാരുകൾ ആവശ്യമായ നിയമനിർമ്മാണങ്ങളോ സാമ്പത്തിക പങ്കാളിത്തമോ ഉറപ്പാക്കേണ്ടതുണ്ടെന്നും അദ്ദേഹം കൂട്ടിച്ചേർത്തു.

​ഭവന നിർമ്മാണ രംഗത്തെ മാന്ദ്യവും തൊഴിൽ നഷ്ടവും തടയുക എന്ന ലക്ഷ്യത്തോടെയാണ് ഈ താൽക്കാലിക ഇളവുകൾ പ്രഖ്യാപിക്കുന്നത്. നിലവിൽ ഒൻ്റാരിയോയിൽ 10 ലക്ഷം ഡോളർ വരെയുള്ള വീടുകൾക്ക് നികുതി പൂർണ്ണമായും ഒഴിവാക്കിയിട്ടുണ്ട്. നിർമ്മാണ സാമഗ്രികളുടെ ഉയർന്ന വിലയും കുറഞ്ഞ ഡിമാൻഡും കാരണം 2028 വരെ പുതിയ വീടുകളുടെ നിർമ്മാണത്തിൽ ഇടിവുണ്ടാകുമെന്ന് കാനഡ മോർട്ട്ഗേജ് ആൻഡ് ഹൗസിംഗ് കോർപ്പറേഷൻ മുന്നറിയിപ്പ് നൽകിയിട്ടുണ്ട്. ഈ സാഹചര്യത്തിൽ, ബ്രിട്ടീഷ് കൊളംബിയ ഉൾപ്പെടെയുള്ള മറ്റ് പ്രവിശ്യകളും സമാനമായ പദ്ധതികൾ നടപ്പിലാക്കണമെന്ന് ആവശ്യപ്പെട്ട് പ്രാദേശിക ഭരണകൂടങ്ങൾ രംഗത്തെത്തിയിട്ടുണ്ട്.