എഡ്മണ്ടനിൽ ഓഡോമീറ്റർ റീഡിംഗിൽ കൃത്രിമം കാട്ടി ലക്ഷങ്ങളുടെ തട്ടിപ്പ്: പഞ്ചാബ് സ്വദേശി പിടിയിൽ

വാഹനങ്ങളുടെ ഓഡോമീറ്റർ റീഡിംഗിൽ മാറ്റം വരുത്തി ഉപഭോക്താക്കളെ വഞ്ചിച്ച കേസിൽ എഡ്മണ്ടൻ പോലീസ് ഒരാളെ അറസ്റ്റ് ചെയ്തു. ഹർമൻദീപ് സിംഗ് ബിന്ദ്ര എന്നയാളാണ് പോലീസിൻ്റെ പിടിയിലായത്. കൂടുതൽ കിലോമീറ്റർ ഓടിയ വാഹനങ്ങൾ വാങ്ങി, അവയിലെ റീഡിംഗ് കുറച്ചു കാണിച്ച ശേഷം ഉയർന്ന വിലയ്ക്ക് മറിച്ചു വിറ്റാണ് ഇയാൾ തട്ടിപ്പ് നടത്തിയിരുന്നത്.

2025 മാർച്ച് മുതൽ ഫേസ്ബുക്ക് മാർക്കറ്റ് പ്ലേസ് വഴി ഇയാൾ നിരവധി വാഹനങ്ങൾ വാങ്ങിയിരുന്നു. ലക്ഷക്കണക്കിന് കിലോമീറ്റർ ഓടി പഴകിയ വാഹനങ്ങളുടെ ഓഡോമീറ്ററിൽ മാറ്റം വരുത്തി, അത് വളരെ കുറഞ്ഞ ദൂരം മാത്രം സഞ്ചരിച്ച വാഹനമാണെന്ന് വരുത്തിത്തീർത്താണ് വിൽപ്പന നടത്തിയിരുന്നത്. ഇതിനായി വ്യാജ ഫേസ്ബുക്ക് അക്കൗണ്ടുകളും ഇയാൾ ഉപയോഗിച്ചു.
 
വാഹനത്തിൻ്റെ യഥാർത്ഥ അവസ്ഥ മറച്ചുവെക്കാൻ വ്യാജ 'കാർഫാക്സ്' റിപ്പോർട്ടുകളും ഇയാൾ ഉപഭോക്താക്കൾക്ക് നൽകിയിരുന്നു. നിസാൻ ആൾട്ടിമ, ഹോണ്ട അക്കോർഡ്, ഹോണ്ട സിആർവി എന്നീ മോഡലുകളാണ് ഇയാൾ പ്രധാനമായും തട്ടിപ്പിനായി ഉപയോഗിച്ചിരുന്നത്. ഹാരി സ്മിത്ത്, ഹാരി സിംഗ്, ഗുരുദേവ് തുടങ്ങിയ വ്യാജ പേരുകളിലും ഇയാൾ അറിയപ്പെട്ടിരുന്നതായി പോലീസ് കണ്ടെത്തി.

മാർച്ച് 13-ന് ലഭിച്ച രഹസ്യവിവരത്തെ തുടർന്ന് നടത്തിയ അന്വേഷണത്തിലാണ് തട്ടിപ്പ് പുറത്തുവന്നത്. നിലവിൽ രണ്ട് പരാതിക്കാർ പോലീസിനെ സമീപിച്ചിട്ടുണ്ടെങ്കിലും കൂടുതൽ പേർ ഇത്തരത്തിൽ വഞ്ചിക്കപ്പെട്ടിട്ടുണ്ടാകാമെന്ന് പോലീസ് സംശയിക്കുന്നു. വാഹനം വാങ്ങുമ്പോൾ സർവീസ് സംബന്ധമായ കാര്യങ്ങളും അപകട വിവരങ്ങളും അറിയാൻ യഥാർത്ഥ കാർഫാക്സ് റിപ്പോർട്ടുകൾ സ്വന്തമായി പരിശോധിക്കുന്നത് ഇത്തരത്തിലുള്ള സാമ്പത്തിക നഷ്ടങ്ങൾ വരാതിരിക്കാൻ സഹായിക്കുമെന്ന് പൊലീസ് അറിയിച്ചു.