ബഹിരാകാശ ചരിത്രത്തിൽ ഇടംപിടിച്ച് കാനഡ: ആർട്ടെമിസ് II ദൗത്യത്തിൻ്റെ സ്മരണാർത്ഥം പുതിയ നാണയം പുറത്തിറക്കി

 

ചന്ദ്രനിലേക്കുള്ള മനുഷ്യൻ്റെ മടക്കയാത്രയായ നാസയുടെ ആർട്ടെമിസ് II  ദൗത്യത്തിൽ പങ്കാളിയായ കനേഡിയൻ ബഹിരാകാശ സഞ്ചാരി ജെറമി ഹാൻസണെ ആദരിച്ചുകൊണ്ട് റോയൽ കനേഡിയൻ മിൻ്റ് പ്രത്യേക വെള്ളി നാണയം പുറത്തിറക്കി. 2026 ഏപ്രിൽ 1-ന് വിജയകരമായി വിക്ഷേപിച്ച ആർട്ടെമിസ് II ദൗത്യം നിലവിൽ ചന്ദ്രനെ ഭ്രമണം ചെയ്ത് ഭൂമിയിലേക്കുള്ള മടക്കയാത്രയിലാണ്.

കനേഡിയൻ കലാകാരി പാണ്ടോറ യംഗ് രൂപകൽപ്പന ചെയ്ത ഈ നാണയത്തിൽ സ്പേസ് സ്യൂട്ട് ധരിച്ച ജെറമി ഹാൻസൻ്റെ ചിത്രമാണുള്ളത്. പ്രത്യേക തരം അൾട്രാവയലറ്റ്  വെളിച്ചത്തിൽ നോക്കുമ്പോൾ നാണയത്തിലെ ചന്ദ്രൻ പ്രകാശിക്കുകയും, സഞ്ചാരിയുടെ ഹെൽമറ്റിലെ വൈസറിൽ ഭൂമിയുടെ പ്രതിബിംബം തെളിയുകയും ചെയ്യും.

20 ഡോളർ മുഖവിലയുള്ള ഈ നാണയം 99.99% ശുദ്ധമായ വെള്ളിയിലാണ് നിർമ്മിച്ചിരിക്കുന്നത്. ഏകദേശം 280 കനേഡിയൻ ഡോളറാണ് ഇതിൻ്റെ വിപണി വില. 50 വർഷത്തെ ഇടവേളയ്ക്ക് ശേഷം ചന്ദ്രനിലേക്ക് മനുഷ്യനെ എത്തിക്കുന്ന നാസയുടെ പദ്ധതിയിലെ ആദ്യത്തെ മിഷനാണിത്. ഏപ്രിൽ ആറിന് ചന്ദ്രനെ ചുറ്റിയ ദൗത്യം, ഭൂമിയിൽ നിന്ന് ഏറ്റവും കൂടുതൽ ദൂരം (ഏകദേശം 4,00,000 കിലോമീറ്റർ) സഞ്ചരിച്ച മനുഷ്യർ എന്ന റെക്കോർഡും കരസ്ഥമാക്കി. പത്ത് ദിവസത്തെ യാത്രയ്ക്ക് ശേഷം ഏപ്രിൽ 10-ന് പസഫിക് സമുദ്രത്തിൽ പേടകം തിരിച്ചിറങ്ങും.

വരും തലമുറയ്ക്ക് പ്രചോദനമാകാനാണ് ഈ സ്മരണിക പുറത്തിറക്കിയതെന്ന് അധികൃതർ വ്യക്തമാക്കി. ലോകമെമ്പാടുമുള്ള ശേഖരണക്കാർക്കായി 7,500 നാണയങ്ങൾ മാത്രമാണ് മിൻ്റ് പുറത്തിറക്കിയിട്ടുള്ളത്.