കാനഡയിലെ വിമാനത്താവളങ്ങളിൽ റൺവേ സുരക്ഷാ ഭീഷണി വർദ്ധിക്കുന്നു; ജാഗ്രതാ നിർദ്ദേശവുമായി അധികൃതർ

 

കാനഡയിലെ പ്രധാന വിമാനത്താവളങ്ങളിൽ റൺവേയുമായി ബന്ധപ്പെട്ട സുരക്ഷാ വീഴ്ചകൾ വർദ്ധിക്കുന്നതായി റിപ്പോർട്ട്. അനുമതിയില്ലാതെ വിമാനങ്ങളോ വാഹനങ്ങളോ റൺവേയിൽ പ്രവേശിക്കുന്ന 'റൺവേ ഇൻകർഷൻ'  സംഭവങ്ങളിൽ വലിയ വർദ്ധനവാണ് രേഖപ്പെടുത്തിയിരിക്കുന്നത്. കഴിഞ്ഞ വർഷം മാത്രം ഇത്തരത്തിലുള്ള 639 സംഭവങ്ങൾ റിപ്പോർട്ട് ചെയ്തതായി ട്രാൻസ്‌പോർട്ടേഷൻ സേഫ്റ്റി ബോർഡ്  വ്യക്തമാക്കി.

റിപ്പോർട്ടുകളുടെ എണ്ണം വർദ്ധിക്കുന്നുണ്ടെങ്കിലും, വലിയ അപകടങ്ങൾ തലനാരിഴയ്ക്ക് ഒഴിവാകുന്നത് ആശ്വാസകരമാണെന്ന് വിദഗ്ധർ ചൂണ്ടിക്കാട്ടുന്നു. സുരക്ഷാ സംവിധാനങ്ങളുടെ കൃത്യമായ ഇടപെടൽ മൂലമാണ് വലിയ ദുരന്തങ്ങൾ ഒഴിവാകുന്നത്. വർദ്ധിച്ചുവരുന്ന വിമാന ഗതാഗതവും, എയർ ട്രാഫിക് കൺട്രോളർമാരുടെ കുറവും, സങ്കീർണ്ണമായ ഗ്രൗണ്ട് ഓപ്പറേഷൻസുമാണ് ഈ സുരക്ഷാ വെല്ലുവിളികൾക്ക് കാരണമായി ചൂണ്ടിക്കാണിക്കപ്പെടുന്നത്.

പൈലറ്റുമാരും എയർ ട്രാഫിക് കൺട്രോളർമാരും തമ്മിലുള്ള ആശയവിനിമയം മെച്ചപ്പെടുത്തുന്നതിനും അത്യാധുനിക മുന്നറിയിപ്പ് സംവിധാനങ്ങൾ റൺവേകളിൽ സ്ഥാപിക്കുന്നതിനും 'നാവ് കാനഡ' (NAV CANADA) പ്രത്യേക പദ്ധതികൾ ആവിഷ്കരിച്ചിട്ടുണ്ട്. റൺവേ സുരക്ഷ മെച്ചപ്പെടുത്തുന്നതിനായി പൈലറ്റുമാരുടെ പരിശീലനത്തിലും കാര്യമായ മാറ്റങ്ങൾ വരുത്തിയിട്ടുണ്ട്. ചെറിയ പിഴവുകൾ പോലും കൃത്യമായി റിപ്പോർട്ട് ചെയ്യുന്നത് ഭാവിയിലെ വലിയ അപകടങ്ങൾ ഒഴിവാക്കാൻ സഹായിക്കുമെന്ന് അധികൃതർ വ്യക്തമാക്കി. യാത്രക്കാരുടെ സുരക്ഷ ഉറപ്പാക്കാൻ വിട്ടുവീഴ്ചയില്ലാത്ത നടപടികൾ തുടരുമെന്നും ട്രാൻസ്‌പോർട്ട് കാനഡ അറിയിച്ചു.