കാനഡയോടുള്ള താൽപ്പര്യം കുറയുന്നു; അമേരിക്കൻ കുടിയേറ്റക്കാരുടെ എണ്ണത്തിൽ വൻ ഇടിവ്

കാനഡയിൽ സ്ഥിരതാമസത്തിന് എത്തുന്ന അമേരിക്കക്കാരുടെ എണ്ണത്തിൽ സമീപകാലത്തായി വലിയ കുറവ് രേഖപ്പെടുത്തുന്നതായി പുതിയ റിപ്പോർട്ട്. മുൻകാലങ്ങളിൽ സ്ഥിരതാമസത്തിനായി  അപേക്ഷിച്ചിരുന്ന അമേരിക്കൻ പൗരന്മാരുടെ എണ്ണത്തിൽ വലിയ ഇടിവാണ് ഉണ്ടായിട്ടുള്ളത്. കുടിയേറ്റ നിയമങ്ങൾ കാനഡ കർശനമാക്കിയതാണ് ഈ മാറ്റത്തിന് പ്രധാന കാരണമായി വിദഗ്ധർ ചൂണ്ടിക്കാട്ടുന്നത്. വർക്ക് പെർമിറ്റുകൾക്കും സ്റ്റഡി വിസകൾക്കും ഏർപ്പെടുത്തിയ പുതിയ നിബന്ധനകൾ കാരണം കാനഡയുടെ 'പോയിൻ്റ് സിസ്റ്റം' വഴി യോഗ്യത നേടുന്നത് പല അമേരിക്കക്കാർക്കും ഇപ്പോൾ പ്രയാസകരമായി മാറിയിരിക്കുന്നു.

നിയമപരമായ തടസ്സങ്ങൾക്ക് പുറമെ കാനഡയിലെ വർധിച്ചുവരുന്ന ജീവിതച്ചെലവും വീട്ടുവാടകയും കുടിയേറ്റക്കാരെ പിന്നോട്ട് വലിപ്പിക്കുന്നുണ്ട്. പ്രത്യേകിച്ച് ടൊറൻ്റോ, വാൻകൂവർ തുടങ്ങിയ പ്രധാന നഗരങ്ങളിൽ താമസിക്കുക എന്നത് വലിയ സാമ്പത്തിക ബാധ്യതയായി മാറിയിരിക്കുകയാണ്. കാനഡയിലെ സാമ്പത്തിക വളർച്ച മന്ദഗതിയിലായതോടെ തൊഴിലവസരങ്ങൾ കുറഞ്ഞതും സ്വന്തം നാട്ടിൽ മികച്ച ജോലിയുള്ള അമേരിക്കക്കാരെ അവിടെത്തന്നെ തുടരാൻ പ്രേരിപ്പിക്കുന്നുണ്ട്. നിലവിൽ ഏഷ്യയിൽ നിന്നും ആഫ്രിക്കയിൽ നിന്നുമുള്ള കുടിയേറ്റക്കാർക്കാണ് കാനഡ കൂടുതൽ മുൻഗണന നൽകുന്നത്. ഇന്ത്യ, ചൈന, ഫിലിപ്പീൻസ് തുടങ്ങിയ രാജ്യങ്ങളിൽ നിന്നുള്ളവരാണ് ഇപ്പോൾ കാനഡയിലെ ആരോഗ്യ, സാങ്കേതിക മേഖലകളിൽ കൂടുതലായി എത്തുന്നത്.

അമേരിക്കയിലെ ആഭ്യന്തര രാഷ്ട്രീയ സാഹചര്യങ്ങളിൽ വന്ന മാറ്റങ്ങളും ആളുകളുടെ കുടിയേറ്റ തീരുമാനങ്ങളെ സ്വാധീനിക്കുന്നുണ്ട്. കാനഡയിലേക്ക് മാറാൻ ആഗ്രഹിച്ചിരുന്ന പലരും ഇപ്പോൾ സ്വന്തം രാജ്യത്ത് തന്നെ തുടരുന്നതാണ് സുരക്ഷിതമെന്ന് കരുതുന്നു. വിദഗ്ധ തൊഴിലാളികൾക്ക് മാത്രം വിസ നൽകുന്ന രീതിയിലേക്ക് കാനഡ മാറിയതോടെ സാധാരണക്കാരായ അമേരിക്കക്കാർക്ക് കുടിയേറ്റം അസാധ്യമായി.  നിലവിലെ കർശനമായ കുടിയേറ്റ നയങ്ങളിൽ മാറ്റം വരുത്തിയില്ലെങ്കിൽ അമേരിക്കയിൽ നിന്നുള്ളവരുടെ വരവ് ഇനിയും കുറയാനാണ് സാധ്യതയെന്നും റിപ്പോർട്ടുകൾ വ്യക്തമാക്കുന്നു.