കാനഡയിൽ പലിശ നിരക്ക് കുറച്ചതോടെ 47 ലക്ഷം പേർ അനധികൃത പണമിടപാടുകാരുടെ കെണിയിലായേക്കുമെന്ന് പോലീസ് മുന്നറിയിപ്പ്

കാനഡയിൽ വായ്പകളുടെ പരമാവധി പലിശ നിരക്ക് കുറച്ചുകൊണ്ടുള്ള പുതിയ നിയമം പ്രാബല്യത്തിൽ വന്നതോടെ, ദശലക്ഷക്കണക്കിന് ആളുകൾ അനധികൃത പണമിടപാടുകാരുടെ കെണിയിൽപ്പെടാൻ സാധ്യതയുണ്ടെന്ന് പോലീസ് മുന്നറിയിപ്പ് നൽകി . 2025 ജനുവരി മുതൽ നടപ്പിലാക്കിയ പരിഷ്കാരം അനുസരിച്ച്, വായ്പകളുടെ പരമാവധി വാർഷിക പലിശ നിരക്ക് 48 ശതമാനത്തിൽ നിന്നും 35 ശതമാനമായി കുറച്ചിട്ടുണ്ട്.

ബാങ്കുകളിൽ നിന്നോ അംഗീകൃത ധനകാര്യ സ്ഥാപനങ്ങളിൽ നിന്നോ വായ്പ ലഭിക്കാൻ പ്രയാസമുള്ള സാധാരണക്കാരെ ഈ മാറ്റം ദോഷകരമായി ബാധിക്കുമെന്നാണ് ആശങ്ക. കൃത്യമായ ക്രെഡിറ്റ് സ്കോറില്ലാത്ത കുടിയേറ്റക്കാർ, വിദ്യാർത്ഥികൾ, കുറഞ്ഞ വരുമാനക്കാർ എന്നിവരുൾപ്പെടെ ഏകദേശം 4.7 ദശലക്ഷം ആളുകൾക്ക് ഇതോടെ നിയമപരമായ വായ്പകൾ നിഷേധിക്കപ്പെട്ടേക്കാം. ഇതിൽ ഭൂരിഭാഗവും വർഷം 50,000 മുതൽ 1,00,000 ഡോളർ വരെ വരുമാനമുള്ള മധ്യവർഗ കുടുംബങ്ങളാണ്.

നിയമപരമായ വായ്പകൾ ലഭിക്കാതെ വരുമ്പോൾ ഇവർ ഓൺലൈനിലും മറ്റും പരസ്യം നൽകുന്ന അനധികൃത പണമിടപാടുകാരെ സമീപിക്കാൻ സാധ്യതയുണ്ട്. ഇത്തരം സംഘങ്ങൾ പലപ്പോഴും സുരക്ഷിതമെന്ന വ്യാജേനയാണ് പ്രവർത്തിക്കുന്നതെങ്കിലും, ഇവർക്ക് അന്താരാഷ്ട്ര കുറ്റവാളി സംഘങ്ങളുമായി അടുത്ത ബന്ധമുണ്ടെന്ന് പോലീസ് ചൂണ്ടിക്കാട്ടുന്നു. വായ്പ തിരിച്ചടവ് മുടങ്ങുന്ന പക്ഷം വലിയ രീതിയിലുള്ള ഭീഷണികളും പീഡനങ്ങളുമാണ് ഇരകൾക്ക് നേരിടേണ്ടി വരുന്നത്.

മുൻപ് ക്യുബെക്ക്, കാലിഫോർണിയ, ബ്രിട്ടൻ എന്നിവിടങ്ങളിൽ പലിശ നിരക്ക് കുറച്ചപ്പോൾ സമാനമായ രീതിയിൽ അനധികൃത പണമിടപാടുകൾ വർധിച്ചതായി റിപ്പോർട്ടുകളുണ്ട്. അംഗീകൃത സ്ഥാപനങ്ങളിൽ നിന്ന് മാത്രം വായ്പകൾ എടുക്കണമെന്നും സംശയാസ്പദമായ ഇടപാടുകളെക്കുറിച്ച് അധികൃതരെ അറിയിക്കണമെന്നും കാനഡ പോലീസ് ജനങ്ങളോട് ആവശ്യപ്പെട്ടു.