ആഗോള ഊർജ്ജ പ്രതിസന്ധി: കാനഡ നേരിടുന്ന വെല്ലുവിളികളും ആശ്വാസവും

ഹോർമുസ് കടലിടുക്കിലെ സംഘർഷങ്ങളെത്തുടർന്ന് ലോകം കടുത്ത ഊർജ്ജ പ്രതിസന്ധി നേരിടുമ്പോഴും, ഇന്ധന ലഭ്യതയിൽ കാനഡ സുരക്ഷിതമെന്ന് റിപ്പോർട്ട്. ലോകത്തെ നാലാമത്തെ വലിയ എണ്ണ ഉൽപ്പാദക രാജ്യമായ കാനഡയിൽ, മറ്റു രാജ്യങ്ങളിലേതുപോലെ ഇന്ധനക്ഷാമം ഉണ്ടാകില്ലെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു. എന്നാൽ, ആഗോള വിപണിയിലെ വിലവർദ്ധനവ് കനേഡിയൻ പമ്പുകളിലും പ്രതിഫലിക്കുന്നത് സാധാരണക്കാർക്ക് തിരിച്ചടിയാവുകയാണ്.

സ്വന്തമായി വൻതോതിൽ എണ്ണ നിക്ഷേപവും അത്യാധുനിക ശുദ്ധീകരണ ശാലകളും ഉള്ളതിനാൽ കാനഡയിൽ പെട്രോൾ ലഭ്യതയിൽ കുറവുണ്ടാകില്ല. ഏഷ്യൻ രാജ്യങ്ങൾ ഇന്ധന നിയന്ത്രണങ്ങളിലേക്ക് നീങ്ങുമ്പോഴും കാനഡ ഈ കാര്യത്തിൽ വലിയ ആശ്വാസത്തിലാണ്. കാനഡയുടെ പ്രകൃതിവാതക വിതരണ സംവിധാനത്തിന് ആഗോള വിപണിയുമായി നേരിട്ട് വലിയ ബന്ധമില്ല. അതിനാൽ, യൂറോപ്പിലുളളത് പോലെ വിലയിൽ പെട്ടെന്നുള്ള കുതിച്ചുചാട്ടം ഇവിടെ പ്രകടമല്ല. ഇന്ധനലഭ്യത ഉണ്ടെങ്കിലും അന്താരാഷ്ട്ര വിപണിയിലെ വിലവർദ്ധനവ് കാനഡയെയും ബാധിച്ചിട്ടുണ്ട്. കഴിഞ്ഞ മാസം മാത്രം പെട്രോൾ വിലയിൽ 30 ശതമാനവും ഡീസൽ വിലയിൽ 38 ശതമാനവും വർദ്ധനവാണ് രേഖപ്പെടുത്തിയത്. ഇത് സാധാരണക്കാരുടെ ജീവിതച്ചെലവ് കുത്തനെ ഉയരാൻ കാരണമായി.

ഊർജ്ജ സുരക്ഷയുടെ കാര്യത്തിൽ രാജ്യം സുരക്ഷിതമാണെങ്കിലും, ആഗോള വിപണിയിലെ ഉയർന്ന വില നൽകേണ്ടി വരുന്നത് കാനഡയിലെ പണപ്പെരുപ്പം വർദ്ധിപ്പിക്കുന്നുണ്ട്. ഉൽപ്പന്നങ്ങളുടെ കടത്തുകൂലി വർദ്ധിക്കുന്നത് വിപണിയിൽ നിത്യോപയോഗ സാധനങ്ങളുടെ വില ഉയരാനും കാരണമായേക്കാം.ചുരുക്കത്തിൽ, ഇന്ധനക്ഷാമത്തിൽ നിന്ന് രാജ്യം മുക്തമാണെങ്കിലും ആഗോള പ്രതിസന്ധി സൃഷ്ടിക്കുന്ന സാമ്പത്തിക ആഘാതങ്ങൾ കാനഡയ്ക്ക് വലിയ വെല്ലുവിളിയാണ് ഉയർത്തുന്നത്.