ആർട്ടെമിസ് II:  ബഹിരാകാശത്തുനിന്നും ചരിത്രപരമായ ആദ്യ വീഡിയോ കോളുമായി ജെറമി ഹാൻസൺ

കനേഡിയൻ ബഹിരാകാശ പര്യവേഷണ ചരിത്രത്തിൽ പുതിയ അധ്യായം കുറിച്ചുകൊണ്ട്, ആർട്ടെമിസ് II ദൗത്യത്തിലെ അംഗമായ കേണൽ ജെറമി ഹാൻസൺ ഭൂമിയിലേക്ക് ആദ്യമായി തത്സമയ വീഡിയോ കോൾ നടത്തി. പത്ത് ദിവസം നീണ്ടുനിൽക്കുന്ന ചന്ദ്രയാത്രയുടെ മൂന്നാം ദിവസം, നാസയുടെ ഓറിയോൺ പേടകത്തിൽ നിന്നാണ് അദ്ദേഹം കനേഡിയൻ സ്പേസ് ഏജൻസിയുമായി ബന്ധപ്പെട്ടത്. പരിശീലനകാലത്തെ സിമുലേഷനുകളെക്കാൾ എത്രയോ  ആവേശകരമാണ് യഥാർത്ഥ റോക്കറ്റ് യാത്രയെന്ന് അദ്ദേഹം പറഞ്ഞു. ചന്ദ്രൻ്റെ പശ്ചാത്തലത്തിൽ ഭൂമിയുടെ അതിമനോഹരമായ ദൃശ്യങ്ങൾ ദൗത്യത്തിൻ്റെ പ്രധാന ആകർഷണമെന്നും ജെറമി ഹാൻസൺ കൂട്ടിച്ചേർത്തു.

സി.എസ്.എ (CSA) പ്രസിഡൻ്റ് ലിസ കാംബെൽ ആണ്  ഈ ചരിത്രപരമായ സംഭാഷണങ്ങൾക്ക് നേതൃത്വം നൽകിയത്.
അമ്പത് വർഷത്തെ ഇടവേളയ്ക്ക് ശേഷം ചന്ദ്രനെ വലംവെക്കുന്ന ആദ്യ മനുഷ്യ ദൗത്യമായ ആർട്ടെമിസ് II-ൽ ജെറമി ഹാൻസണെ കൂടാതെ മൂന്ന് നാസ ബഹിരാകാശ സഞ്ചാരികൾ കൂടിയുണ്ട്. ഈ ദൗത്യത്തിൽ കാനഡയുടെ സാന്നിധ്യം അറിയിച്ചുകൊണ്ട് മറ്റൊരാൾ ഉണ്ട്.  കനേഡിയൻ ബഹിരാകാശ യാത്രികയായ ജെന്നി ഗിബ്ബൺസ്  'ക്യാപ്‌സ്യൂൾ കമ്മ്യൂണിക്കേറ്റർ'  ആയാണ് സേവനമനുഷ്ഠിക്കുന്നത്. ചന്ദ്രൻ്റെ മറുപുറത്ത് നിന്നുള്ള അപൂർവ്വമായ സൂര്യഗ്രഹണം നിരീക്ഷിക്കാനുള്ള ഒരുക്കത്തിലാണ് ഇപ്പോൾ സംഘം.   ബഹിരാകാശ പര്യവേഷണത്തിൽ കാനഡയുടെ കരുത്ത് തെളിയിക്കുന്ന സുപ്രധാന നാഴികക്കല്ലായാണ് ഈ ദൗത്യം വിലയിരുത്തപ്പെടുന്നത്