കാനഡയിൽ പത്തുപതിറ്റാണ്ടിനിടയിലെ ഏറ്റവും ഉയർന്ന മെനിഞ്ചൈറ്റിസ് ബാധ; ആരോഗ്യവകുപ്പ് ആശങ്കയിൽ

 

കാനഡയിൽ അതീവ അപകടകാരിയായ ഇൻവേസീവ് മെനിംഗോക്കോക്കൽ ഡിസീസ് (IMD) ബാധിക്കുന്നവരുടെ എണ്ണം കഴിഞ്ഞ പത്തു വർഷത്തിനിടയിലെ ഏറ്റവും ഉയർന്ന നിരക്കിലെത്തിയതായി റിപ്പോർട്ടുകൾ. തലച്ചോറിനെയും സുഷുമ്‌നാനാഡിയെയും ബാധിക്കുന്ന മെനിഞ്ചൈറ്റിസ്, രക്തത്തിലെ അണുബാധ (സെപ്സിസ്), അവയവങ്ങളുടെ തകരാർ എന്നിവയ്ക്കും കാരണമാകുന്നു. ഈ രോഗം അതിവേഗത്തിലാണ് ശരീരത്തെ കീഴടക്കുന്നത്.

2021-ൽ രാജ്യത്തുടനീളം 48 കേസുകൾ മാത്രം റിപ്പോർട്ട് ചെയ്ത സ്ഥാനത്ത്, 2025 ആയപ്പോഴേക്കും ഇത് 155 ആയി ഉയർന്നു. 2012-ന് ശേഷമുള്ള ഏറ്റവും ഉയർന്ന കണക്കാണിത്. ഈ വർഷം ഇതിനോടകം തന്നെ പത്തോളം പ്രവിശ്യകളിലായി 63 കേസുകൾ സ്ഥിരീകരിച്ചു കഴിഞ്ഞു. പത്തുപേരിൽ ഒരാൾ എന്ന നിലയിൽ ഈ ബാക്ടീരിയയെ ശരീരത്തിൽ വഹിക്കുന്നുണ്ടെങ്കിലും, പ്രതിരോധശേഷി കുറഞ്ഞവരിലേക്ക് ഇത് എത്തുമ്പോഴാണ് മാരകമായ രോഗമായി മാറുന്നത്.

ശിശുക്കളെയും യുവാക്കളെയുമാണ് ഈ രോഗം പ്രധാനമായും ബാധിക്കുന്നതെന്ന് പബ്ലിക് ഹെൽത്ത് ഏജൻസി ഓഫ് കാനഡ വ്യക്തമാക്കുന്നു. കാനഡയിൽ ഈ രോഗം ബാധിക്കുന്നവരിൽ 14 ശതമാനത്തോളം പേർ മരണപ്പെടുന്നു എന്നതും, രക്ഷപ്പെടുന്നവരിൽ 15 മുതൽ 20 ശതമാനം വരെ ആളുകൾക്ക് കേൾവിക്കുറവ്, അംഗവൈകല്യം, നാഡീസംബന്ധമായ തകരാറുകൾ എന്നിവ സംഭവിക്കുന്നു എന്നതും സ്ഥിതിയുടെ ഗൗരവം വർദ്ധിപ്പിക്കുന്നു.

രോഗബാധയുടെ പ്രവചനാതീതമായ സ്വഭാവവും വിവിധ തരത്തിലുള്ള ബാക്ടീരിയ ഉപവിഭാഗങ്ങളുടെ സാന്നിധ്യവും ആരോഗ്യവിദഗ്ധരെ ആശങ്കയിലാഴ്ത്തുന്നുണ്ട്. പനി, കഠിനമായ തലവേദന, ഛർദ്ദി എന്നിവയാണ് ഇതിന്റെ പ്രാഥമിക ലക്ഷണങ്ങൾ. നിലവിൽ ലഭ്യമായ വാക്സിനുകൾ എടുക്കുന്നതിലൂടെയും രോഗലക്ഷണങ്ങൾ കണ്ടാലുടൻ കൃത്യമായ ചികിത്സ തേടുന്നതിലൂടെയും അപകടസാധ്യത കുറയ്ക്കാനാകുമെന്ന് ഡോക്ടർമാർ മുന്നറിയിപ്പ് നൽകുന്നു.