ഫണ്ട് വകമാറ്റൽ തിരിച്ചടിയായി; കാൽഗറിയിലെ ജലവിതരണ ശൃംഖല തകർച്ചയുടെ വക്കിൽ

 

കാൽഗറി നഗരത്തിലെ ജലവിതരണ സംവിധാനം ഗുരുതരമായ പ്രതിസന്ധിയിലാണെന്ന് വിദഗ്ധരുടെ മുന്നറിയിപ്പ്. നഗരത്തിലെ പൈപ്പുകൾ ഉൾപ്പെടെയുള്ള അടിസ്ഥാന സൗകര്യങ്ങൾ പരിതാപകരമായ അവസ്ഥയിലാണെന്നും അടിയന്തരമായി നവീകരണ പ്രവർത്തനങ്ങൾ നടത്തിയില്ലെങ്കിൽ വൻ പ്രത്യാഘാതങ്ങൾ നേരിടേണ്ടി വരുമെന്നും റിപ്പോർട്ടുകൾ സൂചിപ്പിക്കുന്നു.

കഴിഞ്ഞ ഏതാനും വർഷങ്ങളായി ജലവിതരണത്തിനായി നീക്കിവെച്ച ബജറ്റിൽ നിന്ന് ഓരോ വർഷവും ഏകദേശം 10 കോടി ഡോളറാണ്  നഗരസഭ വകമാറ്റിക്കൊണ്ടിരുന്നത്. പൈപ്പുകളുടെ അറ്റകുറ്റപ്പണികൾക്കും നവീകരണത്തിനുമായി ഉപയോഗിക്കേണ്ട ഈ തുക മറ്റ് നഗര വികസന പദ്ധതികൾക്കായി വിനിയോഗിച്ചതാണ് ഇപ്പോഴത്തെ പ്രതിസന്ധിക്ക് കാരണം. മതിയായ അറ്റകുറ്റപ്പണികൾ നടക്കാത്തതിനാൽ നഗരത്തിലെ ജലവിതരണ പൈപ്പുകൾ പഴകി ദ്രവിച്ച നിലയിലാണ്. പൈപ്പുകൾ പൊട്ടുന്നതും ജലവിതരണം തടസ്സപ്പെടുന്നതും നഗരത്തിൽ പതിവാകുന്നു.

നഗരത്തിലെ ജനസംഖ്യ വർദ്ധിക്കുന്നതിനനുസരിച്ച് ജലവിതരണ ശേഷി വർദ്ധിപ്പിക്കാൻ നഗരസഭയ്ക്ക് സാധിച്ചിട്ടില്ല. മുൻപ് പലതവണ നഗരത്തിൽ ജലക്ഷാമവും വെള്ളം തിളപ്പിച്ചു കുടിക്കാനുള്ള നിർദ്ദേശങ്ങളും നൽകേണ്ടി വന്നിട്ടുണ്ട്. നിലവിലെ സംവിധാനം എത്രത്തോളം സമ്മർദ്ദത്തിലാണെന്നതിൻ്റെ തെളിവുകളാണിത്.ദീർഘകാലാടിസ്ഥാനത്തിലുള്ള സുരക്ഷയെ അവഗണിച്ച് ഹ്രസ്വകാല ലാഭത്തിനായി ഫണ്ട് വകമാറ്റുന്നത് അപകടകരമായ നീക്കമാണെന്ന് വിദഗ്ധർ ചൂണ്ടിക്കാട്ടുന്നു. കാലാവസ്ഥാ വ്യതിയാനവും വരൾച്ചയും സ്ഥിതിഗതികൾ കൂടുതൽ വഷളാക്കുന്നുണ്ട്. അടിസ്ഥാന സൗകര്യ വികസനത്തിന് മുൻഗണന നൽകാത്ത പക്ഷം ഭാവിയിൽ വലിയൊരു ജലപ്രതിസന്ധിയെയാകും കാൽഗറി നേരിടേണ്ടി വരികയെന്നും വിദഗ്ധർ മുന്നറിയിപ്പ് നൽകുന്നു.