ബിയർസ്പാവ് പൈപ്പ് ലൈൻ പുനഃസ്ഥാപിക്കുന്നു: കുടിവെള്ളത്തിന് നേരിയ ക്ലോറിൻ ഗന്ധവും നിറവ്യത്യാസവും അനുഭവപ്പെട്ടേക്കാമെന്ന് അധികൃതർ

 

കാല്ഗറിയിലെ ബിയർസ്പാവ് സൗത്ത് ഫീഡർ മെയിൻ പൈപ്പ് ലൈൻ അറ്റകുറ്റപ്പണികൾക്ക് ശേഷം വീണ്ടും പ്രവർത്തനസജ്ജമാകുന്നതോടെ, വരും ദിവസങ്ങളിൽ കുടിവെള്ളത്തിന് നേരിയ ക്ലോറിൻ ഗന്ധവും നിറവ്യത്യാസവും  അനുഭവപ്പെട്ടേക്കാമെന്ന് അധികൃതർ അറിയിച്ചു. ചൊവ്വാഴ്ച രാവിലെ പൈപ്പിൻ്റെ വാൽവുകൾ തുറക്കുകയും ബിയർസ്പാവ് പ്ലാൻ്റിലെ പമ്പുകൾ പ്രവർത്തിപ്പിച്ചു തുടങ്ങുകയും ചെയ്തു.

ജലത്തിൻ്റെ ഗുണനിലവാരം കർശനമായ പരിശോധനകൾക്ക് വിധേയമാക്കിയതായും അത് പൂർണ്ണമായും സുരക്ഷിതമാണെന്നും നഗരസഭാ ഉദ്യോഗസ്ഥർ വ്യക്തമാക്കി. സിസ്റ്റം സാധാരണ നിലയിലായാൽ നിലവിലുള്ള ജലനിയന്ത്രണങ്ങൾ വ്യാഴാഴ്ചയോടെ പിൻവലിക്കാൻ സാധിക്കുമെന്നാണ് പ്രതീക്ഷിക്കുന്നത്. പൈപ്പ് ലൈനിലെ മർദ്ദം പുനഃക്രമീകരിക്കുന്നത് അതീവ ജാഗ്രതയോടെയാണ് കൈകാര്യം ചെയ്യുന്നത്. പഴക്കമേറിയ പൈപ്പായതിനാൽ വീണ്ടും തകരാറുകൾ സംഭവിക്കാനുള്ള സാധ്യത മുൻകൂട്ടി കണ്ട് ഏപ്രിൽ 9 മുതൽ 11 വരെ അത്യാധുനിക ഡൈവിംഗ് ഉപകരണങ്ങൾ ഉപയോഗിച്ച് വിശദമായ പരിശോധന നടത്താനും തീരുമാനിച്ചിട്ടുണ്ട്. പൈപ്പ് ഓഫ്‌ലൈനിലായിരുന്ന കഴിഞ്ഞ ഏഴ് ദിവസവും നഗരവാസികൾ ജലഉപയോഗത്തിൽ കാണിച്ച മിതത്വം സംവിധാനത്തെ സുസ്ഥിരമായി നിലനിർത്താൻ സഹായിച്ചു. പുതിയ പൈപ്പ് ലൈൻ ബന്ധിപ്പിക്കുന്നതിനായി ഈ വർഷം അവസാനം വീണ്ടും പൈപ്പ് ലൈൻ അടച്ചിടേണ്ടി വന്നേക്കാം