2026-ലെ ഫിഫ ലോകകപ്പിന് മുന്നോടിയായി കാനഡയിൽ തട്ടിപ്പ് സംഘങ്ങൾ സജീവമാകുന്നു, ജാഗ്രതാനിർദ്ദേശവുമായി കനേഡിയൻ ആൻ്റി ഫ്രോഡ് സെൻ്റർ

2026-ലെ ഫിഫ ലോകകപ്പിന് മുന്നോടിയായി കാനഡയിൽ തട്ടിപ്പ് സംഘങ്ങൾ സജീവമാകുന്നതിനെതിരെ അധികൃതർ  ജാഗ്രതാനിർദ്ദേശം നൽകി. കാനഡ, അമേരിക്ക, മെക്സിക്കോ എന്നീ രാജ്യങ്ങൾ സംയുക്തമായാണ് ഇത്തവണ ലോകകപ്പിന് ആതിഥ്യമരുളുന്നത്. ടൊറൻ്റോയിലും വാൻകൂവറിലുമാണ് കാനഡയിലെ മത്സരങ്ങൾ നടക്കുന്നത്. കനേഡിയൻ ആൻ്റി ഫ്രോഡ് സെൻ്ററാണ് ഈ മുന്നറിയിപ്പിന് പിന്നിൽ.  

വ്യാജ ടിക്കറ്റുകൾ നൽകി ആരാധകരെ വഞ്ചിക്കാൻ തട്ടിപ്പുകാർ ശ്രമിച്ചേക്കാമെന്ന് അധികൃതർ മുന്നറിയിപ്പ് നൽകി. താമസസൗകര്യങ്ങൾക്കായുള്ള ഹ്രസ്വകാല വാടക കരാറുകളിലും വലിയ തോതിൽ തട്ടിപ്പ് നടക്കാൻ സാധ്യതയുണ്ട്. വ്യാജ ഉൽപ്പന്നങ്ങളും സേവനങ്ങളും വാഗ്ദാനം ചെയ്തും ആളുകളെ കെണിയിൽപ്പെടുത്തിയേക്കാം. മത്സരങ്ങൾ കാണാനെത്തുന്നവരോട് മുൻകൂട്ടി പണം നിക്ഷേപിക്കാൻ  തട്ടിപ്പുകാർ ആവശ്യപ്പെടാറുണ്ട്. ഗുണനിലവാരമില്ലാത്തതോ സുരക്ഷിതമല്ലാത്തതോ ആയ ഉൽപ്പന്നങ്ങൾ വൻ വിലക്കുറവിൽ വാഗ്ദാനം ചെയ്തും തട്ടിപ്പുകൾ നടക്കുന്നു.

പണം നൽകുന്നതിന് മുൻപ് അതീവ ജാഗ്രത പാലിക്കണമെന്ന് പൊലീസ് നിർദ്ദേശിച്ചു. ഫിഫയുടെ ഔദ്യോഗിക ഏജൻസികളിൽ നിന്ന് മാത്രം ടിക്കറ്റുകൾ വാങ്ങാൻ ആരാധകർ ശ്രദ്ധിക്കണം. താമസസൗകര്യങ്ങൾ ബുക്ക് ചെയ്യുന്നതിന് മുൻപ് വിവിധ വെബ്സൈറ്റുകൾ വഴി അവയുടെ വിശ്വാസ്യത ഉറപ്പുവരുത്തണം. സംശയാസ്പദമായ എന്തെങ്കിലും ശ്രദ്ധയിൽപ്പെട്ടാൽ ഉടൻ തന്നെ പൊലീസിനെ അറിയിക്കണം. 48 ടീമുകൾ പങ്കെടുക്കുന്ന ഈ വൻ കായിക മാമാങ്കം 2026 ജൂൺ 11-നാണ് ആരംഭിക്കുന്നത്. കാനഡയിൽ ആകെ 13 മത്സരങ്ങളാണ് നടക്കുക. ഇതിൽ ആറ് മത്സരങ്ങൾ ടൊറൻ്റോയിലും ഏഴ് മത്സരങ്ങൾ വാൻകൂവറിലുമാണ് നടക്കുന്നത്.