ഒൻ്റാരിയോ സൺഷൈൻ ലിസ്റ്റ് പുറത്തുവിട്ടു; പൊതുമേഖലയിൽ ഏറ്റവും കൂടുതൽ ശമ്പളം കൈപ്പറ്റുന്നവരുടെ പട്ടികയിൽ മിന്നുന്ന നേട്ടവുമായി ഒപിജി

ഒൻ്റാരിയോയിലെ പൊതുമേഖലാ സ്ഥാപനങ്ങളിൽ ഒരു ലക്ഷം ഡോളറിലധികം വാർഷിക ശമ്പളം വാങ്ങുന്നവരുടെ 2025-ലെ 'സൺഷൈൻ ലിസ്റ്റ്' പുറത്തിറക്കി. ഒൻ്റാരിയോ പവർ ജനറേഷൻ (OPG) മുൻ പ്രസിഡൻ്റും സിഇഒയുമായ കെന്നത്ത് ഹാർട്ട്വിക്ക് ആണ് 1.9 മില്യൺ ഡോളറിലധികം ശമ്പളവുമായി പട്ടികയിൽ ഒന്നാമത്. വൈദ്യുതി കോർപ്പറേഷനിലെ ഉദ്യോഗസ്ഥരാണ് പട്ടികയിലെ ആദ്യ അഞ്ച് സ്ഥാനങ്ങളിൽ . നിലവിലെ ഒപിജി സിഇഒ നിക്കോൾ ബുച്ചർ 1.6 മില്യൺ ഡോളറുമായി രണ്ടാം സ്ഥാനത്തുണ്ട്. പ്രീമിയർ ഡഗ് ഫോർഡിൻ്റെ ശമ്പളം മുൻവർഷത്തെക്കാൾ വർധിച്ച് 269,567 ഡോളറിലെത്തി.

ടൊറൻ്റോ മേയർ ഒലിവിയ ചൗ ഉൾപ്പെടെയുള്ള ജനപ്രതിനിധികളുടെ ശമ്പളത്തിലും ഇത്തവണ വർധനവുണ്ടായിട്ടുണ്ട്.
കഴിഞ്ഞ വർഷത്തെ അപേക്ഷിച്ച് ഒരു ലക്ഷം ഡോളറിലധികം ശമ്പളം വാങ്ങുന്നവരുടെ എണ്ണത്തിൽ ഗണ്യമായ വർധനവാണ് രേഖപ്പെടുത്തിയിരിക്കുന്നത്. ഈ വർഷം 4,04,922 പേരാണ് പട്ടികയിൽ ഇടംപിടിച്ചത്. മുൻവർഷം ഇത് 3,77,881 ആയിരുന്നു. മുനിസിപ്പാലിറ്റികൾ, പോലീസ്, ഫയർ സർവീസസ്, സ്കൂൾ ബോർഡുകൾ, ആശുപത്രികൾ തുടങ്ങിയ മേഖലകളിലെ ശമ്പള വർധനവാണ് ഇതിന് പ്രധാന കാരണമെന്ന് ട്രഷറി ബോർഡ് പ്രസിഡൻ്റ് കരോലിൻ മൾറോണി വ്യക്തമാക്കി.

അതേസമയം, 1996-ൽ നിശ്ചയിച്ച ഒരു ലക്ഷം ഡോളർ എന്ന പരിധി പണപ്പെരുപ്പത്തിനനുസരിച്ച് പുതുക്കാത്തതിനാൽ സൺഷൈൻ ലിസ്റ്റിൻ്റെ പ്രസക്തി കുറയുകയാണെന്ന് വിവിധ യൂണിയൻ നേതാക്കൾ അഭിപ്രായപ്പെട്ടു.