കുടിയേറ്റ നിയമങ്ങൾ കടുപ്പിച്ച് യൂറോപ്യൻ യൂണിയൻ; അനധികൃത കുടിയേറ്റക്കാർക്കായി പ്രത്യേക തടങ്കൽ കേന്ദ്രങ്ങൾ വരുന്നു

യൂറോപ്യൻ യൂണിയൻ തങ്ങളുടെ കുടിയേറ്റ നയങ്ങളിൽ വലിയ മാറ്റങ്ങൾ വരുത്തുന്നു. അനധികൃത കുടിയേറ്റക്കാരെ തിരിച്ചയക്കുന്നതിനും അവർക്കായി പ്രത്യേക തടങ്കൽ കേന്ദ്രങ്ങൾ സ്ഥാപിക്കുന്നതുമടക്കം കർശനമായ നിയമങ്ങളാണ് നടപ്പിലാക്കാൻ ഒരുങ്ങുന്നത്. അമേരിക്കയിൽ ട്രംപ് ഭരണകൂടം സ്വീകരിച്ചിരുന്ന കടുത്ത നിലപാടുകൾക്ക് സമാനമാണ് ഈ നീക്കങ്ങളെന്ന് വിമർശകർ ചൂണ്ടിക്കാട്ടുന്നു.

പുതിയ പരിഷ്കാരം അനുസരിച്ച് യൂറോപ്പിന് പുറത്തുള്ള രാജ്യങ്ങളിൽ 'റിട്ടേൺ ഹബുകൾ' സ്ഥാപിക്കും. അഭയം നിഷേധിക്കപ്പെടുന്നവരെ ഇത്തരം കേന്ദ്രങ്ങളിലേക്ക് മാറ്റാനാണ് പദ്ധതി. 2026 ജൂൺ 12 മുതൽ ഈ പുതിയ കുടിയേറ്റ കരാർ പൂർണ്ണതോതിൽ പ്രാബല്യത്തിൽ വരും. നിയമവിരുദ്ധമായി എത്തുന്നവരെ വേഗത്തിൽ നാടുകടത്താൻ പുതിയ നിയമം അധികാരം നൽകുന്നുണ്ട്. ആഫ്രിക്കൻ രാജ്യങ്ങളിലും കെനിയയിലും ഇത്തരം തടങ്കൽ കേന്ദ്രങ്ങൾ തുടങ്ങാൻ ആലോചനയുണ്ട്.

മതിയായ പരിശോധനകളില്ലാതെ അഭയാർത്ഥികളെ തിരിച്ചയക്കുന്നത് മനുഷ്യാവകാശ ലംഘനമാണെന്ന് ആംനസ്റ്റി ഇൻ്റർനാഷണൽ ഉൾപ്പെടെയുള്ള സംഘടനകൾ മുന്നറിയിപ്പ് നൽകുന്നു. ഇറ്റലി ഇതിനോടകം തന്നെ അൽബേനിയയിൽ ഇത്തരം കേന്ദ്രങ്ങൾ നിർമ്മിച്ചു കഴിഞ്ഞു. ജർമ്മനി, ഓസ്ട്രിയ, ഗ്രീസ് തുടങ്ങിയ രാജ്യങ്ങളും സമാനമായ കരാറുകൾക്ക് ശ്രമിക്കുകയാണ്. 2015-ലെ സിറിയൻ യുദ്ധകാലത്ത് ഉണ്ടായതുപോലുള്ള വലിയൊരു കുടിയേറ്റ പ്രതിസന്ധി ഒഴിവാക്കാനാണ് ഈ നീക്കമെന്ന് അനുകൂലിക്കുന്നവർ വാദിക്കുന്നു. എന്നാൽ, അതിർത്തികളിൽ ഇതിനോടകം തന്നെ കുടിയേറ്റക്കാർക്ക് നേരെ അതിക്രമങ്ങളും മോഷണവും നടക്കുന്നതായി റിപ്പോർട്ടുകളുണ്ട്. 2025-ൽ മാത്രം ഏകദേശം 80,000-ത്തോളം പേരെ ഇത്തരത്തിൽ അതിർത്തികളിൽ നിന്ന് നിർബന്ധപൂർവ്വം തിരിച്ചയച്ചിട്ടുണ്ടെന്നാണ് കണക്കുകൾ സൂചിപ്പിക്കുന്നത്.