ഐസ് കസ്റ്റഡിയിലെ ദുരനുഭവങ്ങള് വെളിപ്പെടുത്തി നാഷ്വില് റിപ്പോര്ട്ടര്
By: 600002 On: Mar 30, 2026, 9:16 AM
പി പി ചെറിയാന്
നാഷ്വില് : അമേരിക്കയിലെ നാഷ്വില്ലില് ഇമിഗ്രേഷന് വിഭാഗം കസ്റ്റഡിയിലെടുത്ത മാധ്യമപ്രവര്ത്തക എസ്റ്റിഫാനി റോഡ്രിഗസ് ഫ്ലോറസ് ജാമ്യത്തിലിറങ്ങിയ ശേഷം താന് അനുഭവിച്ച ദുരനുഭവങ്ങള് വെളിപ്പെടുത്തി. തനിക്ക് നിയമപരമായ വര്ക്ക് പെര്മിറ്റ് ഉണ്ടെന്നും, മേഖലയിലെ ഐസ് പ്രവര്ത്തനങ്ങളെക്കുറിച്ച് റിപ്പോര്ട്ട് ചെയ്തതിലെ പ്രതികാരമായാണ് തന്നെ അറസ്റ്റ് ചെയ്തതെന്നും റോഡ്രിഗസ് ആരോപിക്കുന്നു.
മാര്ച്ച് 4-ന് ജിമ്മിന് പുറത്ത് വെച്ചാണ് ഉദ്യോഗസ്ഥര് ഇവരെ പിടികൂടിയത്. തുടര്ന്ന് 16 ദിവസത്തോളം തടങ്കലിലായിരുന്നു.
തടങ്കലില് കഴിഞ്ഞിരുന്ന ജയിലിലെ സാഹചര്യം അതീവ മോശമായിരുന്നുവെന്ന് അവര് പറഞ്ഞു. തല ചൊറിയുന്നു എന്ന് പറഞ്ഞതിന് പേന് ഉണ്ടെന്ന് സംശയിച്ച് അഞ്ച് ദിവസം ഒറ്റപ്പെട്ട സെല്ലില് അടയ്ക്കുകയും, കണ്ണുകള് നീറുന്ന തരത്തിലുള്ള രാസലായനി തലയിലൂടെ ഒഴിക്കുകയും ചെയ്തതായി അവര് വെളിപ്പെടുത്തി.
കുടുംബത്തോടോ അഭിഭാഷകനോടോ സംസാരിക്കാന് ആദ്യ ദിവസങ്ങളില് അനുവാദം നല്കിയിരുന്നില്ല. ശുദ്ധവായു ശ്വസിക്കാനോ കൃത്യമായി ഭക്ഷണം കഴിക്കാനോ പോലും പ്രയാസകരമായ സാഹചര്യമായിരുന്നു അവിടെയെന്നും അവര് കൂട്ടിച്ചേര്ത്തു.
10,000 ഡോളര് ബോണ്ടിലാണ് അവര് നിലവില് മോചിതയായത്. തനിക്ക് ജോലി ചെയ്യാന് നിയമപരമായ അനുമതിയുണ്ടെന്നും ഉടന് തന്നെ റിപ്പോര്ട്ടിംഗിലേക്ക് മടങ്ങുമെന്നും റോഡ്രിഗസ് വ്യക്തമാക്കി.
സംഭവത്തില് ആഭ്യന്തര സുരക്ഷാ വകുപ്പിന്റെ പ്രതികരണത്തിനായി മാധ്യമങ്ങള് കാത്തിരിക്കുകയാണ്.