കുറ്റാരോപിതനായ ഫോര്ട്ട് ബെന്ഡ് കൗണ്ടി ജഡ്ജി കെ.പി. ജോര്ജ് യോഗത്തില് നിന്ന് വിട്ടുനിന്നു
By: 600002 On: Mar 30, 2026, 8:12 AM
പി പി ചെറിയാന്
ഹൂസ്റ്റണ്: രണ്ട് കള്ളപ്പണം വെളുപ്പിക്കല് കേസുകളില് കുറ്റക്കാരനാണെന്ന് കോടതി കണ്ടെത്തിയതിന് പിന്നാലെ നടന്ന കൗണ്ടി കമ്മീഷണര് കോടതിയുടെ ആദ്യ യോഗത്തില് ഫോര്ട്ട് ബെന്ഡ് കൗണ്ടി ജഡ്ജി കെ.പി. ജോര്ജ് പങ്കെടുത്തില്ല. തല്സ്ഥാനത്ത് നിന്ന് രാജിവെക്കാന് അദ്ദേഹം തയ്യാറാകാത്ത സാഹചര്യത്തില് യോഗത്തില് അദ്ദേഹത്തിന്റെ അഭാവം ശ്രദ്ധിക്കപ്പെട്ടു.
കമ്മീഷണര്മാരായ വിന്സെന്റ് മോറലിസ്, ഡെക്സ്റ്റര് മക്കോയ് എന്നിവര് കെ.പി. ജോര്ജ് ഉടനടി രാജിവെക്കണമെന്ന് ആവശ്യപ്പെട്ടു. തന്നെ അന്വേഷിച്ച ഉദ്യോഗസ്ഥരുടെ മേല്നോട്ടം വഹിക്കുന്ന സ്ഥാനത്ത് കുറ്റാരോപിതനായ ഒരാള് തുടരുന്നത് ശരിയല്ലെന്ന് ഡെക്സ്റ്റര് മക്കോയ് വ്യക്തമാക്കി.
കെ.പി. ജോര്ജ് ഒപ്പിട്ട ഗ്രാന്റുകള് അപകടത്തിലാണെന്ന് ചൂണ്ടിക്കാട്ടി ഗവര്ണര് ഗ്രെഗ് ആബട്ട് കത്തയച്ചു. ഇതോടെ ഇരകള്ക്കുള്ള സഹായം, മാനസികാരോഗ്യ സേവനങ്ങള് തുടങ്ങിയവയ്ക്കുള്ള 27 സജീവ ഗ്രാന്റുകള് നിലവില് മരവിപ്പിച്ചിരിക്കുകയാണ്.
ഗ്രാന്റുകള് പുനഃസ്ഥാപിക്കുന്നതിനായി കമ്മീഷണര് ഗ്രേഡി പ്രെസ്റ്റേജിനെ പുതിയ ചുമതലക്കാരനായി കൗണ്ടി തിരഞ്ഞെടുത്തു. കൂടാതെ, ജോര്ജ് ഒപ്പിട്ട രേഖകള് ഓഡിറ്റര്മാര് വിശദമായി പരിശോധിക്കും.
ശിക്ഷാവിധി ജൂണില് വരുന്നത് വരെ അദ്ദേഹത്തിന് യോഗങ്ങളില് പങ്കെടുക്കാനും തന്റെ 200,000 ഡോളര് ശമ്പളം കൈപ്പറ്റാനും നിയമപരമായി തടസ്സമില്ലെന്ന് രാഷ്ട്രീയ വിദഗ്ധര് ചൂണ്ടിക്കാട്ടുന്നു.
കാമ്പെയ്ന് ഫണ്ടില് നിന്ന് 46,500 ഡോളര് വെട്ടിച്ചു എന്ന കേസിലാണ് കെ.പി. ജോര്ജ് കഴിഞ്ഞ ആഴ്ച ശിക്ഷിക്കപ്പെട്ടത്.