സംരക്ഷണ ഉത്തരവ് ലഭിച്ചതിന്റെ തൊട്ടുപിന്നാലെ ഭാര്യയെയും സുഹൃത്തിനെയും ഭര്ത്താവ് വെടിവെച്ചു കൊന്നു
By: 600002 On: Mar 30, 2026, 7:35 AM
പി പി ചെറിയാന്
വാഷിംഗ്ടണ് സ്റ്റേറ്റിലെ മേസണ് കൗണ്ടിയില്, 60 വയസ്സുകാരനായ റോബര്ട്ട് ടി. ചൈല്ഡ് തന്റെ ഭാര്യ അന്നാ ചൈല്ഡിനെയും (46) സുഹൃത്ത് ജേസണ് ഹില്ഡെയെയും (46) ഷോട്ട്ഗണ് ഉപയോഗിച്ച് വെടിവെച്ചു കൊന്നു. കോടതിയില് നിന്ന് ഭര്ത്താവിനെതിരെ സംരക്ഷണ ഉത്തരവ് ലഭിച്ചതിന്റെ തൊട്ടടുത്ത ദിവസമാണ് ഈ ദാരുണ സംഭവം നടന്നത്.
തനിക്ക് ലഭിക്കില്ലെങ്കില് മറ്റാര്ക്കും അവളെ വിട്ടുകൊടുക്കില്ലെന്ന് ഭര്ത്താവ് ഭീഷണിപ്പെടുത്തുന്നതായും താന് സുരക്ഷിതയല്ലെന്നും ചൂണ്ടിക്കാട്ടി മാര്ച്ച് 9-നാണ് അന്ന സംരക്ഷണ ഉത്തരവിനായി അപേക്ഷിച്ചത്.
കഴിഞ്ഞ തിങ്കളാഴ്ച കോടതി ഈ അപേക്ഷ അംഗീകരിക്കുകയും ഭാര്യയുടെ 250 അടി പരിധിയില് പ്രവേശിക്കുന്നതില് നിന്ന് റോബര്ട്ടിനെ വിലക്കുകയും ചെയ്തു. ഇരുവരും വിവാഹമോചന നടപടികളിലുമായിരുന്നു.
ചൊവ്വാഴ്ച വൈകുന്നേരം ഹൂഡ്സ്പോര്ട്ടിലെ വീട്ടില് അതിക്രമിച്ചു കയറിയ റോബര്ട്ട്, ഭാര്യയെയും സുഹൃത്തിനെയും വെടിവെക്കുകയായിരുന്നു. തലയ്ക്ക് വെടിയേറ്റ നിലയിലാണ് ഇരുവരെയും കണ്ടെത്തിയത്.
കൊലപാതകത്തിന് ശേഷം ട്രക്കില് രക്ഷപ്പെട്ട പ്രതിയെ ബുധനാഴ്ച വൈകുന്നേരത്തോടെ പോലീസ് അറസ്റ്റ് ചെയ്തു. ഇയാള്ക്കെതിരെ കൊലപാതകം, അതിക്രമിച്ചു കയറല് എന്നീ കുറ്റങ്ങള് ചുമത്തിയിട്ടുണ്ട്.
കോടതി ഉത്തരവ് റോബര്ട്ടിലേക്ക് ഔദ്യോഗികമായി എത്തുന്നതിന് മുന്പാണ് കൊലപാതകം നടന്നതെന്ന് പോലീസ് അറിയിച്ചു. ഈ മരണം തടയാന് പോലീസിന് കൂടുതല് എന്തെങ്കിലും ചെയ്യാന് കഴിയുമായിരുന്നോ എന്ന് പരിശോധിക്കാന് ഷെരീഫ് ഉത്തരവിട്ടിട്ടുണ്ട്.